Kumba ju long shisien shisnem ka Proseshon Iukharist, hynne ka sngi (02/02/25) ka Assumption Parish Nangbah ka la pynlong ia ka Proseshon Iukharist ha kaba da ki hajar ki paidriewngeit ki la iatuid sha Nangbah bad iashim bynta ha ka Proseshon Iukharist da ka mynsiem kaba shongkun shongblei bad kaba iphuh iphieng.
Ha ka por 10 baje mynstep la pynlong ia ka jingknia Mas Iukharist bakhuid kaba la lamkhmat da u Lyngdohsohblei Cresense Roy Laloo, Procurator ka Jowai Diocese ha ryngkat ki Lyngdohsohblei kiba wan na ki Parish ba marjan. Ha kane ka jingkñia Mas Iukharist bakhuid da ki hajar ki paidriewngeit ki la iashim bynta ha ka iabam iasip ia U Kpu U Rynsi Uba la pynkyntang Uba long ka Met bad ka snam jong U Trai Jisu Khrist.
Ha ka nohphai sngi (1:30 PM) la pynlong ia ka jingiaid proseshon Iukharist hapoh shnong Nangbah lyngba ka kyntoit Lumshor, Pohmission (Pohskur), Iawmusiang da ki sur jingruwai, da ki jingruwai jong ka Cathedral Band Shillong ha shilynter lynti kaba khring ia ki paidbah jong ka shnong Nangbah ban iamih peitkai ia kane ka jingiaid proseshon kaba iphuh ipjieng bad kaba shongkun shongblei bad wanphai pat sha Madan Assumption Parish Mulang.
Ha shwa ban pynkut ia kane ka sngi da ka jingkyrkhu da ka Sakrament bakhuid Tam ka Duwan, la ioh ia ka jingkren kaba sngewtynnat da u Lyngdohsohblei Manbha Pakem halor ka phang ka jingkhraw jong ka Sakrament Iukharist bakhuid kaba long ka Met bad ka Snam ba im jong U Trai Jisu Khrist, kaba U Jisu hi u la ong ha ka miet jingkhawai miet bakhatduh jong u “To shim bad to bam kane ka long ka Met bad ka Snam jong nga”.
