Ka Urban Primary Health Centre (UPHC), Loomkyrwiang, Jowai kum shibynta ban pynsuk ïa ki paidbah ban ïoh check-up ïa ka jinglong jingman jong ki khmat jong ki, ha kane ka 7 tarik u Rymphang ka la pynlong da ka prokram ‘Special Outreach Health Camp’ ha Dorbar Hall ka Dorbar Shnong Loomkyrwiang.
Ha kane ka Special Outreach Health Camp la wan ban ïashim bynta da ki khun jong ka shnong bad kumjuh kiba nabar, kiba la wan ban shim ïa kane ka kabu ban ïoh jingsumar ei ïa ki khmat lyngba ki test bad ki dawai katkum ka jinglong jingman jong ki khmat jong ki.
Lyngba kane ka prokram Special Outreach Health Camp la wan ban ïadonlang u Dr. W. Suna, Medical Officer i/c UPHC, Loomkyrwiang ryngkat ki briew jong ka Bansara Eye Care Clinic, Jowai kiba la pyndep ïa ka Free Eye Check-up bad ka jingai dawai.
