Ka Hynñiewtrep Border Disputed Redressal Forum (HBDRF) mynta ka lah sngi U Blei kala leit ban kynduh ïa u Deputy Commissioner ba thymmai ka West Jaiñtia Hills District u Abhinav Kumar Singh, lAS ha ka jingïadei bad ka jingwanrah ïa ka shongsuk shong saiñ ki Khasi Pnar kiba shong ba sah ha Block -I jong ka thaiñ Labang Nongphyllut khamtam ha kum kane ka por ba don ka Election MDC.
U Chairman ka HBDRF ma Chandame Sungoh ha ka jingkren sha ki lad pathai khubor ula ong na ka liang ka seng naduh kine ki sngi ba la dep kata ha ka 27 tarik u Kyllalyngkot kila dep ban ujor ïa kane ka jingeh kaba lah ban mih ha ki por Election.
Ula pyntip ba ki ar tylli ki District kin wanrah ïa ka shongsuk shong shngaiñ da kaba kin pynlong ïa ka jingïalang (Video Conference) ha ka 14 tarik mynta u bnai ban ïaid ryntih ka Election khnang ban nym mih kino kino ki jinghuri hura ha kitei ki jaka khappud.
Shuh shuh ula pynsngew ba ki briew na katei ka thaiñ Block-I jong ka thaiñ Labang Nongphyllut kila kloi ban wan rung shapoh ka Meghalaya ban long kum ki nongshong shnong ba pura, namar kila kyntaid ruh ia ki kam pynroi kiba wan na ka Assam bad kila kyntaid ruh ban leit thep vote (boycott) na ka bynta ki MLA bad MDC jong ka Assam ha kine ki sngi bala dep.
Kumta ka Forum ka kyrpad jur ïa U Deputy Commissioner ba un shim khia ban ïakren bad u Deputy Commissioner jong ka West Karbi Anglong District ban pynneh pynsah ïaka aiñ ka kanun bad ka shongsuk shong saiñ khnang ba kan ym don shuh ka jingpyntieng pynsmiej bad ka jingpynthud jingpynwit ha ka leit ka wan jong ki paid Khasi Pnar hapoh kane ka por Election MDC.