Ka Kong Rosetta Mary Kurbah, IAS, kaba dei ruh ka Deputy Commissioner, East Khasi Hills District, hynne ka sngi ka la ïakynduh bad ki lad pathai khubor ban pynshai paidbah 2 sngi shwa ba u nongrwai ba paw ka pyrthei, Ed Sheeran un wan rwai ha ka Nongbah Shillong.
Ha kaba iadei bad kane ka concert kaba heh ia kaba yn pynlong ha madan Polo Shillong, ka DC ryngkat bad ki bor pulit, ki tnad ka koit ka khiah ki la ai lypa ka jingpynshai khnang ba katei ka sngi kan iaid beit bad khlem kano kano ka jingklumar.
Ka Kong Kurbah ka la ong ba ha kane ka concert, palat 26 hajar yn wan ki paidbah na kylleng ki jaka kumta ban lait nyngkong na ka jingdheng kali, ki bor pulit kin pynbeit na ka bynta ki jaka ieng kali bad yn ym shah ban rung kali ha ki thaiñ Polo. Ka la pynshai ruh ba ka kyrdop (gate) kan plie naduh 4 baje janmiet bad kyrpad ia ki paidbah ba ki dei ban poi kham kloi ban lait ka jingiañiom.
Ha kaba iadei bad ka jaka mih (exit) kin don 3 tylli ki kyrdop na ka bynta ban kloi bad lait ruh na ka jingiakhynñiat. Nalor kata ka la ong ruh ba yn ym shah ia ki khynnah kiba hapoh 5 snem ban rung hapoh madan, wat lada ki la dep ban thied ia ki ticket ruh yn ym pdiang, ban lait na ka jingshah iuh shah khynñiat.
Ym shah ruh ban rah ia kino kino ki tiar hapoh madan lait noh tang ia ka mobile phone, ki shabi kali/bike bad wallet pisa. Na ka bynta kiba rah helmet yn don katto katne ki jaka buh ha shwa ban rung ha madan, hynrei na ka liang ka DC ka la ai jingmut lada long kaba lah, ka bha ban buh lypa ha kino kino ki jaka ban kham suk namar ban buh lang hajuh kan wanrah jingeh namar ka jingtynñian bad kan bam ia ka por.
Ban pyntikna ruh ia ka koit ka khiah na ka bynta ki paidbah, yn pynbiang ruh ia ki Ambulance bad ki medical team. Nalor kata ban shngaiñ bad lait na kino kino ki jingjia ba sngewsih, yn pynbiang ruh ia ka kynhun pynlip ding, ka kynhun pulit man ki dong bad ki nongiarap man ki jaka.