Ha ka 13 tarik mynta u bnai, u MLA ka Mawlai Constituency, Bah Brightstarwell Marbaniang u la sei da ka kot ha khmat ki paidbah ha ka jingialang ba la pynlong da ka seng Voice of the people’s party (VPP) ha Jaiaw, kaba dei ruh kum ka kot jingpynshisha ba u MDC ka Mawlai, Bah Teibor Pathaw u la dep ban mynjur bad la dep ban soi na ka bynta ban lilam ia ki jaka ha khap-pud Assam-Meghalaya. Ha kaba iadei bad kane, u Bah Pathaw u la shim ia ka kabu ban jubab hynne ka sngi ka 18 tarik Rymphang ha ka jingialang ba la pynlong da ka Mawlai town na ka bynta ki kyrtong MDC sha KHADC.
U Bah Pathaw u la ong ba u MLA ka Mawlai u la leit rah bad leit pyni man ki jingialang ia ka kot pynshisha ba u la dep ban soi ia kata ka Dorkhas jaka puta, “tang kawei nga kwah ban ong ia u MLA ba don burom, da wad jingtip bha shwa, kaei ba ngi ki nongmihkhmat ngi la shim na ka bynta ban ai jingkyrshan ia ka Sorkar. Ka District Council kam don ia ka bor ban iasaid ia ka MoU, ngi ruh ngin don bor ban iasaid ia ka MoU” ong u Bah Pathaw.
U Teibor u la pynshai ba u la don ha ka Sorkar shipor ban ai ia ka jingkyrshan hynrei ym ban don bynta ha ka jinglilam jaka. U la ther tyngeh ruh ia u Bah Brightstarwell ba u la kynnoh khlem Nongrim bad ong ruh ba kine kidei tang ki jingthmu ban pynsngewthuh bakla ia u Paidbah ka Mawlai.
U Bah Pathaw u la kam ba haduh 7 tylli ki jaka ha khap-pud la dep ban pynbeit ha ka por ba u la long kum u EM ha KHADC.
Ha kane ka rynsan, u Bah Pathaw u la jubab ruh na bynta katto katne ki kyrtong bad ki riew paidbah kiba la kynnoh ba u Bah Pathaw u khlem pat mih na ka NPP hynrei u long mynta tang kum u myrsiang kup snieh langbrot, ha kaba iadei bad kane ruh u la ong “Ngam donkam ba ngan pynngeit ia phi, bad shu phah ia ka jaka sah (address) jong phi ba ngan pyni ia ka shithi iehnoh kam jong nga. Ngam don jingiadei ei ei shuh bad ka NPP” jubab u Bah Pathaw.