U ma Brightstar Chyrmang kum u kyrtong shimet u ban ïakhun na ka 17 Nangbah-Mihmyntdu Constituency ha ka jingïalap ‘Election’ hynnin ka sngi 18 tarik, ula buh ka jingkyrpad na ki paidbah ka shnong Mihmyntdu kaba dei kawei na ki shnong ba buh eh ki nongthep vote hapoh ka Constituency ba kin pynjop donburom biang ïa u sa shisien ha kane ka kynti.
Kum u kyrtong uba la jop ha u snem 2019 u la ong “Ha ka jinglong MDC ki don shibun ki jingduna kiba ngam pat lah ban pyndep bad mynta nga la nang ïoh jingmut shuh shuh kumno ban treikam na ka bynta ka bha ka miat jong ki paidbah”, ha kaba ula buh ka jingkyntu bad kyrpad ïa ki paidbah ka shnong Mihmyntdu ba kin jied biang ïa u kum u MDC jong ki ha kane ka kynti.
Ula ong kiba bun ki shnong hapoh ka Constituency ki tip bha ïa ka rukom treikam jong u kum u MDC, wat ki skim MDC baroh ula dep ban pynpoi sha ki paidbah ka Constituency, da kaba ong ka kamram ki nongmihkhmat ka dei ban pynïaid beit bad pynïaid ryntih ïa ki skim hapoh ki Constituency.
Shuh shuh u ma Brightstar ula pynsngew “Ka pisa jong ka sorkar ka dei ka pisa jong ki paidbah, ïa kaba la lum khajna na manla uwei pa uwei u nongshong shnong, kino kino ki jingpyntrei ïa ki kam pynroi ki dei beit ka pisa u paidbah”.
Ha kaba ïadei bad ka jingmih jong u na ka NPP, ula pynshai paidbah ba ka jingmih jong u na kane ka seng ka long halor ka jingïohi jong u ïa ka jingma kaba lah ban ap ïa ka District Council, kata naduh jingduh tulop ki nongtrei bad ka jingsahkut jong ki skim bapher bapher kiba wan na ka sorkar. Da kaba u ong lada duh ka District Council la tikna ba ka jaitbynriew kan duh shi syndon.
“Ka jingdon jong ka District Council lyngba ka Six Scheduled ka long kum ka stieh ban khang lad ïa ki bar jylla ban ïoh thied jaka hapoh kane ka ri ba ieit bad ka long ruh ka nongïada ïa ki trai ri trai muluk. Khnang ban lait na ka jingshah tim ha ki pateng ban wan “To ngin jied ïa ki nongmihkhmat kiba nud ban ïaleh na ka bynta ki trai jylla” la ong u ma Brightstar Chyrmang.
Ha ka juh ka por u buh ka jingkyrpad ïa ki nongshong shnong ka Mihmyntdu bad ïa ki nongthep vote jong ka Constituency hi baroh kawei ba kin tip ban jied ïa ki nongmihkhmat kiba lah ban warah jingmyntoi ïa ki nongshong shnong jong ka Constituency.
Ha kane ka sngi lyngba ki nongkren na ki dong bapher bapher jong ka shnong Mihmyntdu, na Sabahmuswang bad na Nangbah, ki la pynthikna ban ai ka jingkyrshan biang ïa u ma Brightstar Chyrmang sa ha kane ka kynti.
