Ka Dream Mission jong ka Sorkar Jylla ha ka 20 tarik Rymphang 2025 ka la lum ia ka jingialang bad ki kynhun niam bapher bapher na ka bynta ban iathir halor ki mat ban rat dyngkhong ia ka jingjyllei u droks ha ka Jylla.
Ha kane ka sngi la ia don ryngkat lang da u Bah Francis Kharshiing Mission Director jong ka sorkar Jylla, u Myntri ka tnad Social Welfare u Bah Paul Lyngdoh, u Principal Secretary jong ka Sorkar Jylla Sampath Kumar IAS, ki kynhun niam bapher bapher ha ryngkat ki nongpyniaid jong ka Drugs Mission jong ka Sorkar Jylla bad kiwei kiwei de.
Haba kren ha kane ka sngi la pynlong ruh ia ka jingphylliew jingmut hapdeng ki nongpyniaid jong ka Drugs Mission ka sorkar Jylla bad ki kynhun niam bapher bapher ban ia kren haba iadei kumno ban tehlakam bad ban iada ia ki briew na ka jingjyllei u droks u ba dei uwei na ki jingdih pynbuaid ba ktah ia ka imlang ka sahlang bad ka shnong ka thaw.
Ha kane ka sngi haba ai jingkren na ka liang u Mission Director jong ka sorkar Jylla u Bah Francis Kharshiing u la ong ka jinglum ia kane ka jingialang ka long ruh kum shi bynta ban ia thir ban rat dyngkhong ia u drugs ha ka Jylla.
Na ka liang u Bah Paul Lyngdoh Myntri ka tnad ka Social Welfare u la ong ka sorkar kam shong kli kti shibun ki kam ka la pyni haba iadei bad ka jingtehlakam ia u droks ha ki kyndiat bnai ba la dep ka sorkar hapoh ka jingialam jong u Myntri Rangbah u Conrad K Sangma , Myntri ka tnad home u Bah Prestone Tynsong ki la plie ia ka Ophis Anti Narcotick Task Force ka Ophis ban peit ban tehlakam ia ka jingrung jingmih jong u Droks sha ka Jylla bad kumjuh ha kine ki kyndiat bnai ka sorkar ka la thang ia u droks ha kawei na ki jaka thang ha company Cement.
Shuh shuh u la ong ka sorkar kan iatreilang bad ki kynhun bapher bapher ban tehlakam bad ban rat dyngkhong ia u Droks ha ka Jylla bad ka sorkar ka la mang pisa 50 lakh na ka bynta ka jingdonkam jong kino kino ki jaka ki ban ai jingsumar bad jinghikai na ka bynta kiba shah ktah ha ka jingkyrni u Droks.
