Ka jingthep vote ha KHADC haduh ka por 3 baje janmiet ka long 60 percent katba ha JHADC ka long 70 percent.
Haba kren sha ki lad pathai khubor na ka liang u Commissioner Secretary ka District Council Affairs , u bah Cyril V Diengdoh u la ong ha KHADC ka jingthep Vote ka iaid beit bad kam don kano kano ka jingklumar.
Shuh shuh u la ong ki don katto katne ki jingklumar na ka bynta ka jingthep vote ha Jaintia Hills Autonomous District Council (JHADC) khamtam ha East Jaintia Hills katkum ka kaiphod na u Deputy Commissioner bad Returning Officer ha ki ar tylli ki konstitwensi bad saw tylli ki jaka thep vote (Polling Station) ha kaba la iathuh ba ki paidbhur kiba ym lah ban ithuh ki la pynjulor ia ki mashin EVM ha baroh ar tylli ki jaka thep vote.
U bah Cyril Diengdoh u la pyntip ba ki la bthah ban thep vote biang ha ka sngi saitjain kata ha ka 22 tarik Rymphang 2025 naduh ka por 7 baje mynstep haduh 4 baje janmiet na ka bynta ki ar tylli ki jaka thep vote kiba hap hapoh ka Musniang-Rangad konstitwensi kata ha Wapungskur A bad Wapungskur B, ha ki artylli ki jaka thep vote kiba hap ha Bataw Lakadong konstitwensi pat ki long ka Bataw A bad Bataw B.