U A.K. Singh, IAS, uba dei u District Magistrate (DM) jong ka West Jaiñtia District ula pyntip ba ka kyndon 163 BNSS, 2023 ïa kaba la dep ban pynbna naduh ka 27.01.2025 kan dang treikam hapoh ka District tad haduh ban da pyndep ïa ka jingñiew vote ha ka 24.02.2025.
Kumta ha ka sngi ba ñiew ïa ki vote ha ka 24 tarik kan don ka jingpyrkhing bha ïa ka long ka man hapoh ka 200 metre na ka jaka ñiew vote.
Na ka liang jong u DM ula pyntip ba kane ka hukum ka la khang pyrshah ïa ka jingwan rung jong kino kino ki briew ki bym shym la ïohbor shapoh ka jaka ñiew vote (Counting Hall) bad hapoh 200 metre radius ha ka sngi ñiew vote.
La khang ïa ka jingrung jong kino kino ki kali hapoh ka 200 metre na ka jaka ñiew vote.
La khang pyrshah ban pyndonkam ïa ki kor pynsawa ba khlaiñbor (Loud Speakers) hapoh ka 200 metre na ka jaka ñiew vote.
La khang ïa ka jingpynïeng kali kulmar ha ki bynta jong u NH-44, ha ki State Highway bad ha ki District Road.
La khang ïa ka jingpynlong Rally da uno ne kano ka kyrong kiba jop haduh ka por 48 kynta bad hapoh ka 200 metre na ka jaka ñiew vote hadien ba la dep ban pynbna jop ïa ki.
La khang ïa ka jingrah ïa kino kino ki tiar pynmynsaw da ki nongbub lane da ki kyrtong, lane ba kin thaw kino kino ki jingïakulmar.
La khang ïa ka jingïalum briew kaba palat ïa ka 5 (san) ngut hapoh ka 200 metre na ka jaka ñiew vote hadien ba la dep ka jingñiew vote.