Ka ophis jong ka Krishi Vigyan Kendra (KVK), Jaiñtia Hills hynnin ka sngi 24 tarik u Rymphang kala pynlong ïa ka prokram ‘Kisan Samman Samaroh’ ha ophis treikam kaba don ha Wahiajer, West Jaiñtia Hills District.
Kane ka prokram ka long shibynta ban pyni ïa ka jingpyllait pisa (grand release) ïa ka 19th Installment jong ka PM Kisan Samman Nidhi (PM-KISAN) Yojana da u Myntri Rangbahduh ka ri India u Narendra Modi.
Kane ka skim ka long shi bynta ban kyntiew ïa ka ïoh ka kot jong ki nongrep ha ka juh ka por kan long ruh kum ka nuksa ïa kiwei ha ka kam rep kam riang, kala don ruh ka jingpyni nam ïa ki mar ki mata kiba bun jait ba la pynmih da ki nongrep bad ka jingdie ïa ki.
Ka Senior Scientist & Head, KVK, Jaiñtia Hills, kong L. Challam ha ka jingkren pdiang kala pynsngew khyndiat shaphang ka jingtreikam jong ka PM-Kisan Scheme. Katba i Dr C. Challam, Scientist ICAR, CPRI-RS, Upper Shillong ila ai jingbatai halor ka rukom rep ïa u phan.
Na ka liang ka kong R. Lyngdoh, Subject Matter Specialist (Agronomy), KVK, Jaiñtia Hills kala ai jinghikai halor ka ‘Integrated Nutrient Management’ kumjuh ruh shaphang ki lad jingïada ha ka rukom rep phan. Kiwei de kiba ai jingkren ki long ka kong M. Mawlong, hadien kane la sam ruh ïa ki khusnam sha ki nongrep.