Hadien shisngi ba ka VPP ka la ioh ia ka jingjop don burom ha ka Elekshon MDC sha KHADC kata da ka jingjop haduh 17 tylli ki konstitwensi, u Bah Sniawbhalang Dhar uba dei ruh u National General Secretary ka National people’s party (NPP) u la kob ba ka NPP ka la pynbha (improved) shibun ia ka rukom treikam bad lada ianujor bad ka Elekshon MP ha u snem ba lah dep la sakhi ba ka jingkiew ka vote ka la long arshah.
U la iathuh ba ha kane ka MP Elekshon, ka NPP ka la rem lut ha baroh ki konstitwensi katba ha kane ka Elekshon MDC, u Paidbah u la kham iohi ia ki kam jong ka seng bad ka vote ruh ka la kiew kumba la khmih lynti. U Bah Sniawbhalang u la kynnoh kylla ba ka VPP ka la pyndonkam da ka bor ban khring vote ha kane ka Elekshon ha kaba la sakhi ruh ha ba ka ïing u Rangbah Shnong barim ka Shnong Narwan, East Jaintia Hills ka la shah kawang maw ha ki nongkyrshan u Prah.
“Ngi burom ia ka jingjied u paidbah ha kaba ki la ai ia ngi haduh 4 tylli ki jingjop bad lada ianujor ha ka MP Elekshon, na 29 tylli ki konstitwensi ngi khlem ioh ei ei bad ka VPP ka la sar lut ploiñ. Bad ha kaba iadei bad ka Jaintia Hills lei ngi la kham pynbha shuh shuh ha kaba palat 50 % la don ka jingkylla”. Kum ka Sorkar MDA hi ia mynta ngi la pynkylla bad pynbha shibun ha ka jingioh vote” kam u Bah Sniawbhalang.
“Tang ha kine ki 8-9 bnai ngi la ioh ban pynkhreh hynrei katne ngi la iohi ia u soh, bad nga tikna ba shwa ka Elekshon MLA 2028 ka VPP kan sa hiar shibun.
Ha kaba iadei bad ka jingthmu ka VPP ban synshar marwei ha KHADC bad ka jingbuh jingkylli jong ki paidbah ba kaei ka ban jia bad kaei ka ban kylla ha kine ki 5 snem “ka jingkhmih lynti ka dei jong u paidbah, bad kumba ki la kular ki dei ban leh namar u Paidbah u long uba stad bad kin sngewsih lada kam long kumba la ong” jubab u Bah Sniawbhalang.