Ki nongpyniaid jong ka 100 Bedded MCH, Hospital, Panaliar shi bynta na ka National Oral Health Programme & National Tobacco Control Programme Under District & Health Officer, West Jaintia Hills, mynta ka sngi kila wan ban pynlong ia ka Dental Awareness and Screening Camp sha ki khynnah skul jong ka Khimusniang Govt.LP School, Jowai.
Ha kane ka sngi la wan ban ai jinghikai da ka Dr. P. Sohmat kaba dei ka Dental Surgean bad ka kong J.Rymbai kaba dei ka Adolescent Counsellor jong katei ka Hospital.
Na ka liang ka kong Rymbai, ka la ai ka jingpynsngewthuh sha ki khynnah skul kiba la don ha ka rta ba la kham san (Teenagers) lane kita ki Adolescent. Kala ai ka jingsneng jingkyntu ban kiar na kiei kiei ki jingmlien kiba sniew kum ka jingbam ia ki jait jingbam bym tei met, ka jingdih ia u biri, sikret ne bam kwai bam duma bad ban kiar na ka jingshongkha khynnah, namar ba ka ktah ia ka bor met jong ki khynnah.
Ka kong Rymbai kala ai ruh ki jinghikai ban bam ia ki jait jingbam bapher bapher kiba lah ban tei ia ka bor met jong ki khynnah. Ka la hikai ruh ia ki khynnah skul ba kin tip kumno ban lehkhuid ia la ka met ka phat bad ban nang bha ia ka rukom sait ia ki kti hashwa ban bam jingbam.
Na ka liang jong ka Dr. Sohmat pat kala batai bniah bha halor ka jingsdang jong ka jingpang bniat, kumno ban iada bad sumar na kane ka jingpang kaba ju ioh naduh ki khynnah haduh kiba la rangbah.
Kala batai bniah kumno ka rukom ban shut ia ki bniat da kaba pyni nuksa bad ruh ka kyntu ia ki khynnah skul ban shut bniat ar sien shi sngi kata ha ka por miet bad por step.
Kala don ruh ka check-up ia ki bniat jong baroh ki khynnah skul, kiba la iadon lang ha kane ka prokram da ka Dr. Sohmat.
Hadien ba la kut kane ka prokram kala don ka jingsam ia ki brut shutbniat bad ki dawai shutbniat (Colgate) sha baroh ki khynnah skul. La pynkut ia ka prokram da ka jingiashondur lang ha phyllaw jong ka skul.
