Ka Raij Jowai lyngba ka Dorbar Ñiam ha ka jinglamkhmat u Dolloi kum u khliehduh ka niam, ha ka 2 tarik u Lber kum shi bynta ban pynkhreh bad pynphuh pynphieng ïa ka ‘Iung Langdoh’ ha shwa ban sdang ki jinglehniam na ka bynta ka Behdieñkhlam, la pyndep ïa ka ‘Syrdep Phlang’ da ka jingwan ïashim bynta ki shakri ñiam ka Raij ha ryngkat ki Waheh Wasian ka Seiñraij Jowai.
Ha shwa ban sdang ka ‘Syrdep Phlang’ u Dolloi ka Elaka Jowai u ma Puramon Kynjing ha ryngkat u Pator, u Langdoh, Ki Sangot, ki Wasan, ki Phra Kur –Phra Kmai kiba don ïa ka bynta ha ka kam niam kila pynlong shwa da ka nguh ka dem.
U Dolloi ha ka jingkren ula pynsngew ba kane ka ‘Syrdep Phlang’ ha ka ‘Iung Langdoh’ kala long ka rukom ka dustur bala hikai da ki longshwa manshwa, namar hapoh kane ka ïing la pyndep shibun ki kam niam kam rukom jong ka Raij ka Shnong katkum ki hukum jong u Trekirot.
Ula ong lyngba kane ka ‘Syrdep Phlang’ ka long kum ka lynti ban wanrah ïa ka jingsngew jan bad ka jingkitkhlieh hapdeng ki khun ka Raij na ka bynta ka bha ka miat jong ka ‘Iung Langdoh’.
Ka jingwan ïashim bynta lang ha kane ka ‘Syrdep Yung’ phlang kala long ruh kum ka dak ban sngewburom ïa ka pateng ka ‘Beipun Doh’ kaba long ka nongkha ïa ka pateng ban pyndep ïa ki kam niam khnang ban bit ban biang ha baroh ki liang.
Shuh shuh ula ïathuh ha kane ka ‘Iung Langdoh’ u Dolloi un pyndep ïa ka kam bichar khadar na ka bynta ka shongsuk shongsaiñ bad ka bha ka miat ki khun ka raij ka Shnong, ha kane ka Iung Langdoh la don u Moosmai bad lada don ki jingïakren kiba kham eh bad ka jingbym ïabeit lang, kin pynlong ïa ka jingshim smai ban pyni ïa ki sakhi hakhmat ki Blai ki Syiem.
Ha kaba khadduh u Dalloi ula ong ka jingpyndep niam ha kane ka Iung Langdoh, kam mut tang na ka bynta ki khun ka ñiamtrai, hynrei ka long ïa baroh lang ki khun ka Raij ka Shnong.
