U Myntri Rangbah ka jylla Meghalaya u Conrad K Sangma ha ka 4 tarik Lber 2025 u la pyllait paidbah ia ka skhim One Time Settlement (OTS) na ka bynta ki nongpyndonkam bording jong ka Meghalaya Energy Corporation Limited (MeECL) ha ka jingiadon lang u myntri bor ding u Abu Taher Mondal.
Haba pynlait paidbah ia kane ka skhim, u Conrad K Sangma u la ong ba haduh 45,000 ngut ki nongthied kin ioh jingmyntoi bad palat Rs.26 Klur ki jingsiew bad ki jingpynshitom yn pyllait. “Ki nongthied kin hap ban siew ia ka pisa ba kongsan kaba long 40 percent bad kaba sah 60 percent ha ki phra tylli ki bynta kiba iaryngkat khlem ka sut”, u la ong.
U la kyntu ruh ia ki nongthied ba kin shim kabu ia kane ka skhim ban ioh ia ki jingmyntoi ba la pynjlan da ka sorkar. U la ong ba ia kane ka jingiarap la shim da ka sorkar ban pynduna ia ka jingkit kaba khia jong ki nongpyndonkam bording, ki bym pat lah ban siew ia ka bai bording.
Ka OTS Scheme 2025 ka treikam na ka bynta ki nongpyndonkam “Domestic Low Tension (DLT)” bad “Kutir Jyoti/ BPL” kiba la pynbna ia ka jingkit kaba 5 KW shapoh na ka bynta ki nongpyndonkam kiba la shah pynduh bording namar ka jingbym siew, ban ioh biang ia ki bai bording kiba dang sah slem.
Ka One Time Settlement (OTS) Scheme, 2025 kan treikam naduh ka 1 tarik u Risaw, 2025 haduh ka 31 tarik u Risaw, 2025. Dei tang ki nongpyndonkam kiba la shah pynduh bording kiba lah ban apply ia ka OTS Scheme 2025 bad ban ioh ia kane ka jingmyntoi.
Ka jingkhein baroh jong ki nongthied kiba dang sah ka long haduh Rs. 119 Klur.
Ha kane ka sngi, u Myntri Rangbah u la pyllait ruh ia ki 6 tylli ki kali maramot ha ka rukom pyrshang, ia kiba yn pyndonkam da ki linesmen bad ki nongtrei jong ka MeECL ban suk bad kloi ban poi sha ki lain bording ha ki jingjrong bad ki jaka bapher bapher.
“Ka MePDCL ka la pyndonkam da ki kali ba ju pyndonkam bad ki jingkieng na ka bynta ki kam ban pynbha haduh kine ki sngi. Kane ka kali kaba thymmai kaba pyllait mynta ka sngi kan pynthikna ba ki nongtrei lain kin lah ban pynsted ïa ki jingshakri ban maramot bad pynduna ïa ka jingduh bording.
Ka jinglut baroh ban thied ia ki kali ka long Rs. 1.48 klur.
Shuh shuh u myntri rangbah ka jylla u la pyntip ba mynta u snem kan nym don kano kano ka jingpynlip bording (Scheduled Load Shedding). U la ai khublei ia ka tnad na ka bynta ki lad jingiarap bapher bapher kiba la shim ban pynkylla ia ka MeECL ban ai ia ki jingshakri kiba kham bha.
U la pyntip ruh ba ka sorkar ka dang pyrshang ban pynbeit ryntih ïa ka jingsam bording ha ki jaka nongkyndong, kynthup ban buh ïa ki substation ba thymmai. U la ïathuh ruh ba ïa kane ka kam yn sdang ha u bnai ban wan da kaba buh ïa ki 10 tylli ki sub station kiba thymmai.
