Mynta ka kynti ka Kur Pohsnem bad ka Raid Nongtalang hi baroh kawei kila pynkhreh shaid shaid ban pynlong ia ka jinglehniam Rongkhli ha shnong Nongtalang ka ban sdang naduh ka 21 tarik haduh ka 23 tarik u Lber 2025 ha shnong Nongtalang, West Jaintia Hills District.
Naduh ki rangbah Kur jong ka kur Pohsnem, ki khun samla ka Raid Nongtalang bad ki rangbah nongpyniaid ia ka niam ka rukom jong ka Raid Nongtalang kila iabun kam ban pynkhreh pynkhrum ia kane ka jinglehniam ha ki bynta bapher bapher, khnang ba kane ka jinglehniam kan long kaba phuh ba phieng bad kaba jop ha ryngkat ka ngooh ka dem blei.
Kane ka jinglehniam kan sdang naduh ka 21 tarik mynta u bnai, ha kaba yn don ka jinglehniam “Niam tymmet Khli”. Ha ka 22 tarik kan don ka “Niam Rongkhli” naduh ka por mynstep ryngkat ka jingshad Mastieh na ka liang ki Samla Shynrang bud sa ka Shad Kynthei “KELANG” ha ka por janmiet. Ha ka 23 tarik pat ka don biang ka shad Kynthei “KELANG” ka ban sdang naduh ka por 4 baje janmiet.
Kumta na ka liang ka Kur Pohsnem ryngkat ka Raid Nongtalang ki khot ki wer ia ki lok ki jor kiba najan bad na jngai ban wan sakhi lang ia kane ka Rongkhli 2025 mynta ka kynti.
Kum ban shu pynkynmaw ba ka jinglehniam Rongkhli kadei kawei na ki riti dustur jong ka Raid Nongtalang. Ka jinglehniam Rongkhli kaba khaddduh ka long ha u snem 2012.
