Ha ka jingpyrshang ban kyntiew ia ka jingialehkai hapoh ka District bad ban kyntiew ia ka jingiashim bynta kaba kham bun ha ki jingialehkai bad ka jingpynrung lang ia ki kynthei, ka Directorate of Sports & Youth Affairs, Meghalaya, Shillong ryngkat ka jingiatreilang bad ka ophis jong i District Sports Officer, East Jaintia Hills District bad ka Rymbai Government Higher School Khelo India Centre, ha ka 8/3/2025 kila pynlong ïa ka lympung siat khnam ha madan ïalehkai Rymbai Wahshnong, East Jaiñtia Hills District.
Ha kani ka sngi la iadonlang i District Sports Officer (DSO), East Jaiñtia Hills District kong Stephanie M. Rapsang ha ka jingdon lang jong i Principal, ka skul kong Younilas Lamare, u Finance Secretary ka shnong Rymbai, u ma C. F Bareh, u General Secretary jong ka East Jaintia Hills District Sports Association (EJDSA), u ma Coming Tlang bad katto katne ngut kiwei pat.
Ha kane ka lympung la pyni ïa ka jingïashim bynta ba shlur jong ki kynthei ka thaiñ ha ka kyrdan Senior, Junior bad Sub-Junior. La sam khusnam pisa sha ki nongjop ha ka Individual Category ha kaba ïa ki nongjop ba nyngkong la ai khusnam pisa kaba long Rs. 1500/-, ka khusnam kaba ar Rs. 1000/- bad ka khusnam kaba lai Rs. 500/- tyngka.
Ha ka Senior Individual Category ka Isabella Tlang ka la rah ia ka nam ba nyngkong bud sa ka kong Gratify Nongpluh bad ka kong Aibanhun Lyngdoh ha ka nam ba ar bad ba lai.
Ha ka Junior Individual Category, ka Jasmine Nongpluh ka la ioh ia ka nam ba nyngkong, ka Ebanroiki Bareh ka la ioh ia ka nam ba ar bad ka Fatima Lyngdoh ka la wan ba lai.
Ha ka Sub-Junior Individual Category, ka PhillawanshwaThoo kala wan ba nyngkong, ka Tredaka Nongtdu ka la wan ba-ar bad ka Victoria Rymbaiwon kala wan ba lai.
