Na ka daw ka jingpyntrei ïa ka surok National Highway 6 ha ka thaiñ Narpuh East Jaiñtia Hills District, ka jingdheng kali kaba jur ka ju jia man la ka sngi ha ka thaiñ Narpuh bad ka ju buh jingeh bad buh jingma haduh katta katta ïa ki nongtrei kiba pyntrei ïa ka surok bad kumjuh ruh ïa ki nong leit nong wan kiba iaid lyngba na kane ka surok na Narpuh.
Ban tehlakam ïa ka jingdheng kali ha Narpuh, kumjuh ruh ha Mynkre, ha Lumshnong, ha Sonapyrdi ter ter shaduh Ratacherra kam dei ka kam kaba suk lada ka company kaba pyntrei ïa ka surok, ka M/S Dhar Construction company kam ai ka jingīatreilang bad ki bor pulit, namar lada shu peit tang ki bor pulit jong ka Khliehriat, ki pulit Lumshnong bad ki pulit jong ka Umkiang kin nym lah shuh ban leh eiei, kumta la i donkam ba ka Dhar Company ruh ka la dei ban buh lem ïa ki briew ban iarap ïa ki pulit ha kaba pyniaid ïa ki kali khnang ban dup ïaid beit ka rukom pyniaid kali ha ka surok ha Narpuh ba kan nym buh jingma, kan nym buh jingeh than ïa ki nongleit nongwan bad kumjuh ruh ïa ki nongtrei kiba pyntrei ïa katei ka surok.
Hooid, ki nongtrei jong ka M/S Dhar Company ki trei ïa ka kam man ka sngi ha East Jaiñtia Hills District kynthup ha ka thaiñ Narpuh, hynrei ka jingpyntrei pat ka suki haduh katta katta, wat ki paidbah jong ka thaiñ Narpuh ruh ki kubur bad ki sakhi ïa ka jingsuki ka jingpyntrei ïa ka surok ha ka thaiñ Narpuh, ki briew na Narpuh ki ong ruh ba ka jingdon ki nongtrei ruh ka duna bha, kumta la i donkam ba ka Dhar Company ka la dei ban pynbun wat ïa ki nongtrei ki ban trei ïa ka surok ha Narpuh khnang ba ka kam kan kloi bad ruh ba kan nym buh jingeh than ïa ki paidbah ba leit ba wan, ym tang katta ba ïa ka surok ruh yn dup lah ban pyndep ha shwa ka aiom lyiur ba jur slap, namar lada ïa ka surok ym lah ban pyndep ha ka por ba biang, kan sa buh jingma bad buh jingeh ïa ki baleit ba wan lada poi ka aiom slap bad ka jyrsieh ruh kan jur bha ha ka thaiñ.
Na ka liang ki nongshong shnong kiba na ka thaiñ Narpuh, ki kyntu ruh ïa ka Dhar Company ba ka dei ban da pyntrei bha ïa ka surok khnang ba kan skhem kan neh, ym tang shu trei tang dep, namar ki nongshong shnong ka thaiñ ki la lap bad sakhi ba ka jingpyntrei ïa ka surok kam da biang bha bad ka rukom siang rong ruh imat ka shu long tang na sla namar la lap ba ha shnong Kuliang ka rong ba siang surok kam skhem bad kam neh eiei ha surok namar imat la shu siang rong tang ban dep rukom, la pynpaw kitei ki nongshong shnong.
