Ka Rashtriya Bal Swasthya Karyakram, (RBSK) Meghalaya kum shi bynta na ka jingpyndep jong ka ïa ka jingshakri ba shiphew (10) snem ban ai ka jingkoit jingkhia ïa ki khynnah hapoh ka Jylla, mynta ka sngi 12 tarik u Lber kala pynlong da ka prokram leh burom ïa kiba don bynta ha kane ka tnad ka koit ka khiah, ïa kaba la pynlong ha GHM Guest House, Myntdu, Jowai.
Ha kane ka sngi u ma F Passah, Assistant Commissioner, Jowai ula long u kongsan, ha ka jingdonlang ka Dr. P. Shylla, District Medical & Health Officer, Jowai, ka Dr. Helen Uriah, DMCHO, ka Dr. A E Pastwet, Pediatrician, Dr. J. Lakiang, MO DEIC, ki Doctors bad ki members jong ka Mobile Health Team (MHT) bad District Early Intervention Centre (DEIC) Teams jong ki lai tylli ki District kata West Jaiñtia Hills, East Jaiñtia Hills bad Ri-Bhoi District.
Ha ka prokram la kynmaw burom halor ka jingsynñiang jong ki nongtrei ka koit ka khia naduh ki kynhun ka Mobile Health Teams bad ki nongtrei mon sngewbha na Jaiñtia Hills bad Ri Bhoi District kiba la trei shitom ban leit jurip ïa ka jinglong jingman jong ka koit ka khiah ki khynnah kiba don naduh ka rta kaba dangkha haduh 18 snem, ban pynpaw shaphang ki 4Ds- (defect at birth, Disease, Deficiencies and Developmental delays), da kaba pyntikna ïa ka jingsumar biang por ïa ki khynnah.
Na ka liang u ma F. Passah, Assistant Commissioner haba ai jingkren ula ïaroh ïa kane ka kynhun RBSK kaba la shim khia ban ai jingsumar ha ka por ba biang ïa ki khynnah haka liang ka jingkoit jingkhiah jong ki. Ula ïaroh shuh shuh ïa kane ka kynhun kaba la bteng ïa ka jingshakri shaduh ki jaka nongkyndong bad kiba kham jngai wat lada ki hap ban ïaid ha ki lynti synkieng kiba khohruh khohram.
Ka Dr. I Gatphoh, State Nodal Officer, RBSK haka jingkren plie kala pynpaw ka jingsngew sarong halor ka jinglah jong ka RBSK ban poi sha u mawjam ba 10 snem ka jingshakri. Kane ka programme ka long shi bynta ban ai jingsumar ha ka por ba biang ïa ki khynnah ïa kaba la sdang ban pyntreikam naduh u snem 2013 hapoh ka jingïalam jong ka sorkar kmie. Kala pynpaw ka jingsngewhun halor ka jingjop jong ka kane ka prokram na ka bynta ban ai jingïada ïa ki khynnah.
Kala ong ka jingjop jong kane ka prorkam ka dei lyngba ka jingtrei shitom jong ki Mobile Health teams jong ki doctors, ki nurses, ki pharmacists bad ki nongtrei ASHA.
Ka Dr. Gatphoh kala pynsngew lyngba kane ka programme kan pynbha shuh shuh ïa ka koit ka khiah da kala leit jurip ïa ki khynnah ha ki Schools bad ha ki Anganwadi centres.
Katba Dr. H L Suting, DEIC Manager, Jowai iba pynïaid ïa kane ka prokram ila batai halor ka jingdonkam ban pynbha bad ban pynkhlaiñ ïa ka rukom ai jingsumar ïa ki khynnah naduh ka por ba dangkha khnang ban ïoh ïa ka jingkoit jingkhiah kaba paka.
U bah Johnson J Nongbet, Consultant RBSK-NHM haka jingkren ai khublei ula pynpaw ka jingïaroh ïa baroh kiba ïadon bynta ban wanrah ïa ka koit ka khiah jong ki khynnah.
