Ka Dream Mission jong ka Sorkar Jylla ha ka 13 tarik mynta u bnai ka la ioh ban pynlong ia ka jingialang kaba ar bad ki Rangbah Shnong ban iathir iatai halor kumno ban rat dyngkhong ia u drok.
Ha kane ka sngi ia ka jingialang la pyniaid da u Mission Director jong ka Dream Mission jong ka Sorkar u Bah Francis Kharshïing, ha ka jingiadon ryngkat lang u SP ka East Khasi Hills u Bah Vivek Syiem, ki Rangbah Shnong bad ki nongpyniaid jong ka Rehabilitation Centre.
Ha kane ka sngi la ioh ruh ka jingai jingmut ban pynkhlaiñ ia ka jingtreikam jong ka Dream Mission, haba ia dei kumno ban rat dyngkhong ia ka jingjyllei u drok hapoh ka jylla.
Haba kren sha ki ladpathai khubor na ka liang u bah Francis u la ong ki bor shnong ki dei ki atiar kiba khlaiñ ban wanrah ia ka jingbha ha ka imlang ka sahlang bad u la ong ruh ba ka jingiaphylliew jingmut ka long ban kyntu bad ai jingmut sha ki Shnong ban nym ñiew beiñ ia ki khynnah kiba la ngop ha u drok, dei ban pynkhlaiñ ia ki jingai councelling bad ruh ban pynkhlaiñ ia ki sports activities, khnang ba ki khynnah kin ioh ka lad ban ialehkai bad ban lait na ka jingngop ha u drok.
Haba shim bynta lang na ka liang u SP jong ka East khasi Hills u bah Vivek Syiem u la ong, ba ki Shnong ki lah ban Peitngor bha haba dei ki khynnah jong ka Shnong, khamtam kito ki lah pep skul shiteng por, bad ki shongthad lad ha ki lynti shnong bad ki dong bad ban hikai ia ki ha ka lynti kaba dei, bad ki Shnong ki donkam ruh ban pynkhlaiñ ia ki VDP.
Shuh shuh haba ioh ban ia kren bad ki katto katne ngut ki rangbah shnong kiba la wan shim bynta lang ki la pynpaw, ba ha kane ka kynti ka don jingkyrmen ia ki Shnong ban rat dyngkhong ia ka jingwan jyllei u droks.