U Myntri Rangbah Conrad K. Sangma hynne ka sngi ka 13 tarik Lber 2025, kaba dei ruh ka sngi ba pynkut ia ka Dorbar Mang Tyngka jong ka Jylla u la wanrah ia ka jingpynshai halor ka jingioh nam ka Shnong Byrnihat (Ri Bhoi District) kum ka jaka ba jakhlia tam ka lyer ha ka pyrthei.
Ia kane ka kaiphot dang shen la pyntip paidbah da ka World air quality report kaba na Switzerland ha ka jingleit ban lum jingtip jong ki.
Na ka liang u Myntri Rangbah uba long ruh u Nongïalam ha ka jylla, u la diaw ban tip ia kane hynrei u la ong ba ka Sorkar kan wad ia ki lad ki lynti ban pynduna ia ka jingsniew jong ka lyer, ban ïakhun na ka bynta ban pyntikna ba ka Koit ka Khiah ka long kaba khlem shah ktah, ban ïakhun ruh na ka bynta ban pynlong ia ka mariang kaba khuid bad kaba suba. U MR u la pyntikna ruh ba ka Sorkar ka shimkhia bha ha kaba iadei bad kane ka bynta.
U la pynshai ruh ha ka Dorbar ba kane ka jingshah ktah ka dei ym tang na Meghalaya hynrei namar ba kadei ka shnong ba bun ki karkhana bad kaba iajan bha (boder) bad ka Jylla Assam kaba dei ruh ka jylla ba bun bha ki Karkhana ha ka thaiñ Shatei Lam Mihngi.
“La don ka jingpynbeit bad ka jingthmu (plan) hapdeng ki Nongïalam jong ka Aasam bad Meghalaya, watla ka jingshah kdew kti kadei ia ka Meghalaya hynrei ia kane ka bynta ki don ka jingshim khia jong baroh ar tylli kine ki khap-pud. Baroh ar liang hi la ka long ha ki tnad bapher bapher kin ïatreilang na ka bynta ban wanrah jingkheiñ ia kane ka mat” ong u Myntri Rangbah.
U Sangma u la pyntikna ba ia ka kane ka mat yn sa iohi shen ba kan don ka jingkylla, kata ha ka lyer, ka jinglong jong ka mariang da kaba iai pynbha bad wanrah shuh shuh da ki kor kiba kham bha.
Ha kane ka Dorbar, u Myntri Rangbah u la jubab ruh ia ka jingbuh jingkylli jong u Bah Adelbert Nongrum kaba dei ruh ka mat ba la wanrah da ka Sorkar dang shen, kaba ong – ka Meghalaya kan kiew ha ka ioh ka kot, kata ban poi ia ka jingdon kaba haduh 10 billion US Dollar ha shwa u snem 2028. U Bah Nongrum uba dei ruh u MLA ka VPP u la buh jingkylli ia u MR da kaba ong, katno tylli ki Jylla ha India kiba la kynjoh ia ka 10 million dollar ha ka ioh ka kot?
“21 tylli ki Jylla” jubab u Myntri Rangbah. Nalor kata ki Jylla ha North East kum ka Nagaland, Manipur ki dei ki Jylla kiba Syriem ha ka jingheh bad ka jingbun briew. Kine ki Jylla ki dei ruh kiba ka ioh ka kot ki kiew bha”, ong u MR.