Mynta ka sngi dang step ha ka por 5:30 AM ki Pulit jong ka East Jaintia Hills District kila ioh jingtip lyngba ka telephone napoh NERS, Shillong ba ki don 2 (Ar) tylli ki kali Mahindra Thar kiba don ia ki Registration Number AS01FY 2524 bad ka AS01FL 8848 kila shah rongtuh bad iaid lynti lyngba ka shnong Umkiang.
Mar mar ki Pulit jong ka Umkiang PPP kila pynlong ia ka jingpynap shrip ha shnong Damchera bad dei ha ka por 6:30 AM baroh ar tylli kitei ki kali kila shah bat noh ha ki Pulit. Ha kine ki ar tylli ki kali la don 7 ngut ki briew ba kynthup 3 ki shynrang bad 4 ki kynthei.
Ha ka jingtohkit jong ki Pulit kine ki 3 ngut ki shynrang kim lah ban ai ka jubab kaba biang bad kila pyni ruh da ki Aadhaar Card kiba shna thok.
Kumta la leit rah ia ki sha thanad na ka bynta ban pynlong ia ka jingtohkit kaba bniah.
Hadien kane na ka liang jong ki trai kali ruh kila wan poi hapoh thanad, ha kaba kila ong ba kine ki briew ki shimwai ia ki kali jong ki na nongbah Guwahati bad leit sha Shillong. Hynrei klem kano kano ka jingpyntip bad da ka jingthmu ba sniew kila pynduh noh ia u GPS na kawei na kine ki kali bad kila thmu ban iaid shaduh sha ka jylla Manipur lyngba ka jylla Mizoram.
Halor kane ka jingjia ki trai kali kila dep ban ujor ejahar sha u OC jong ka Dispur, Assam bad hadien ba ki Pulit na Umkiang kila phone sha u OC u Krisna Jyoti Bhaskar ula kyntu ia ki ban bat shwa ia kitei ki briew kiba donkti bad ia ki kali khnang ba un ioh ban pynlong ka jingtohkit sa na ka liang jong u.