U ma Wailadmiki Shylla uba dei ruh u MLA ka Jowai ula pynsngew paidbah na ka liang ka NPP Jaiñtia Hills ka kwah ban pynpaw ka jingai khublei ïa u Myntri Rangbah duh ka jylla u Conrad K. Sangma bad kumjuh ïa ka sorkar MDA, halor ka jingplie paidbah jong ka hynnin ka sngi 17 tarik u Lber, 2025 ïa ka rukom tih dewïong katkum ka juk stad ba mynta (scientific mining), ha kawei ka par dewïong kaba don ha shnong Byndihati, East Jaiñtia Hills District kaba tip kum ka ‘‘Saryngkham-A’ .
Ula ong ka NPP Jaiñtia Hills ka pynpaw ïa ka jingai khublei ba kyrpang ïa ka sorkar jylla kaba la shim khia ïa kane ka kam hadien bala pynsangeh da ka NGT ban tih dewïong hapoh ka jylla kaba la dap da ki phew snem mynta bad kane kala ktah bha ïa ka ïoh ka kot jong ki nongshong hapoh ka jylla hi baroh kawei.
Hadien ka jingjop jong ka NPP ha u snem 2019 da ka jingtrei shitom ka sorkar jylla kala ïarap ïa ki trai jaka ba don ïa u dewïong ba kin submit ïa ki kot ki sla ba donkam na ka bynta ban apply ïa ka Mining Plant jong ki katkum ka juk stad ban tih ïa u dewiong lyngba ka jingbthah jong ka Supreme Court ym shuh da ka rukom kaba rim.
Kumba long mynta ka sorkar lyngba ka Ministry of Coal kala ai jingbit ïa ki lai tylli Mining Plant ba kin sdang ïa ka jingtip dewïong (scientific mining), la ong u ma Wailadmiki Shylla, shuh shuh ula pyntip kin dang don bun kiba wan apply ïa ki kot ki sla naka bynta kane ka kam tih dewïong kaba long ruh ka lad jingïada ïaka mariang.
“Ka thong ba hakhmat jong ka sorkar ka long ban ïarap ïa ki paidbah bad da ka jingdon kine ki mining plant kan long ka jingkyrkhu ïa kiba bun ba lang, wat ïa kito ki trai jaka kiba don ïa ki jaka ba kham rit na ka liang ka sorkar kan sa pyrshang ban wad ïa ki lad ki kynti na ka bynta jong ki”, la ong u ma Wailadmiki Shylla.