Ka Jaintia National Council (JNC), Khliehriat Circle mynta ha ka 19.03.25 hapoh ka jingialam u Shanborlang Bamon President ka Circle u Symboh Sumer General Secretary ka Circle lem bad ka jingsynran lang u Wanshwa Suting General Secretary ka JNC Central Executive Committee ka la leit ban iakynduh mar khmat bad u R. Nongtdu ba dei u Sub-Divisional Officer, PHE Electrical, Khliehriat Division na ka bynta ban wad jingtip na ka office trei kam jong u halor ka jingslem jong ka um kor ban wan sha ki shnong bapher bapher kiba don hapoh ka thaiñ Khliehriat.
Ha kane ka jingiakynduh ia u SDO ka PHE, Electrical Khliehriat Division u la iathuh ba kane ka jingpynpoi um sha ki shnong ba don hapoh ka thaiñ khliehriat kiba kynthup haduh 12 tylli ki shnong kim hap hapoh ka Jal Jeevan Mission Scheme hynrei ki hap hapoh ka State Plan Scheme. U la iathuh ruh ia kane ka project ha ka jingshisha la sdang naduh u snem 2007 hynrei namar ba ka la sahteng ym lah shuh ban pyndep ia kane ka project ban pynpoi um sha ki 12 tylli ki shnong kumba la mang kat kum ka por ba la buh bad la hap pat ban revise ia kane ka project bad la sanction pat na ka bynta kane ka project ha u snem 2019-2020, bad ia kane ka project la ioh ban sdang ia ka mynta bad ruh la lah ban pynpoi ia ki pipe um sha baroh ki 12 tylli ki shnong ki ba kynthup naduh ka Deinsatlang, Umsatai, Rymbai, Deinchynrum, baroh ka Ladrymbai, Khliehriat East, Khliehriat West, Dkhiah East bad Dkhiah West bad ia ki tanky um ruh la dep ban shna bad kaba dang sah mynta dei sa tang ban test ia ki pipe um ban pyntikna ba kin ym bthei haba pyndon kam ia ki ban pynpoi um sha kitei ki 12 tylli ki shnong.
U la ong shuh shuh ba ia ka tyllong um ruh la dep ban test da ka pollution board bad da ka office ruh kat kum ka jingbthah jong ka NGT bad la lap ba kane ka tyllong um ka long ka ba bha bad kaba long ban dih.
Na ka liang jong ka JNC-KC ka la kyntu jur ia ka office u SDO ban pynkloi ia kane ka kam katba lah ban pynpoi um sha kine ki 12 tylli ki shnong khamtam sha ka shnong Khliehriat kaba dei ruh ka Headquarter jong ka District kaba don shibun ki briew kiba wan na kylleng ki shnong kiba don hapoh ka District, naduh kiba wan pule, kiba trei sorkar, ki ba trei bylla sngi, kiba shong wai, kiba die dukan ter ter kiba na kylleng ki shnong na ka bynta ki kam bapher bapher jong ki, la ong u Shanbor Bamon President JNC-KC.
Na ka liang u SDO ruh u la kular ban pynkloi katba lah ban pynpoi um hapoh ka shnong Khliehriat na ka bynta ban myntoi ki ba bun ba lang jong ki briew ka District bad u la ong ruh ba ka office kan trei kloi katba lah ban pynpoi um sha kine ki 12 tylli ki shnong hapoh jong une hi u snem 2025.