Mynta ka sngi (7/4/25) ka Sorkar Pdeng lyngba ka tnad Revenue kala pynbna ba kala pynkiew ia ka khajna jong ka Exise duties halor ka umphniang Petrol bad ka Diesel da Rs.2/- shi litar ka ban treikam naduh lashai ka sngi (8/4/25).
Ka dor khajna jong ka Petrol mynshwa ka long Rs.19.90 shi litar bad mynta kan kiew sha ka Rs.21.90 shi litar. katba ka dor khajna jong ka Diesel mynshwa ka long Rs.15.80 mynta kan kiew sha ka Rs.1780 shi litar.
Wat ka ja don kane ka jingpynkiew ia ka khajna umphniang, hynrei u Myntri ba dei peit ia ka Petroleum and Natural Gas u Hardeep Singh Puri u ong ba kane don jingktah tang ia ki company umphiang, katba ka jingdie khutia sha ki paidbah kan ym kylla ne kiew dor.