Ka tnad jong ka rep ka riang lyngba ka ICAR-National Research Center on Pig Rani, Guwahati kala pynsngew ïa ka jingthrang kaba hakhmat eh ban pynkiew ïa ka kam ri Sniang hapoh ka East Jaiñtia Hills kawei na ki District kaba la phai khmat mynta na ka kam dewïong sha ka kam rep kam riang.
Ïa kane la pynsngew da ki nongtrei ka ICAR-National Research Center on Pig Rani, Guwahati ha ka jingïalang ba la pynlong hynnin ka sngi 8 tarik u Ïaïong ha East Side Inn, Ladrymbai Bypass, Jalyiah East Jaiñtia Hills District, Khliehriat ha ryngkat ka jingïatreilang ka KVK, Jaiñtia Hills bad ka ATMA East Jaiñtia Hills.
Ha kane ka prokram ki riew shemphang (scientist) na Guwahati naduh u kongsan Dr. V.V. Gupta uba dei u Director ICAR-NRC on Pig Rani Guwahati bad u Dr. P.J. Das Principal Scientist ICAR-NRC kila wan ban ai jingbatia bniah ïa ki nongri sniang hapoh ka EJHD, haka juh ka por la sam ruh ïa ki jingbam bad ki tiar ba pyndonkam naduh ki kor tylliat bam, ki lights bad ki borti um sha ki nongrep.
Kiwei de kiba ïadonlang ha kane ka sngi ki kynthup ïa ka symbud kongsan ka kong J. U Kharpuri ADC, kong L. Lakiang District Agriculture Officer, Dr. M. Lamare District A.H & Veterinary Officer EJHD kiba la ai jingkren halor ka jingdonkam ban kyntiew ïa ka kam ri shniang hapoh ka East Jaiñtia Hills.
U kongsan V.V Gupta ha ka jingkren ula ai ka jingïaroh ïa ki nongrep jong kane ka thaiñ kila la phai khmat mynta sha ka kam ri jingri, kaba long ruh ka lad ban pyndap bam ïa ka District bad ïa ka Jylla hi baroh kawei.
Ula ong na ka liang ka tnad sorkar kaba dei peit ïa ka kam rep kam riang kala long kaba kloi ban ai jingïarap ïa ki nongrep naduh ka rukom pynïoh bad pynbiang ïa ki marbam jong ki sniang da ka jingïatrei lang bad ka ophis KVK.
Shuh shuh ula ong kino kino ki nongrep kiba donkam ban ïoh jingtip ba khambniah shaphang ka rukom ri sniang katkum ka juk stad ba mynta, ka ophis ka long kaba kloi ban leit ïalam ïa ki sha Center treikam kaba don ha Nongbah Guwahati.
Kiwei de kiba ai jingkren kila pynsngew ba kane ka prokram ka ai mynsiem bad pynshlur ïa ki nongrep ba kin phai khmat sha ka kam ri jingri namar ka District ka dang duna ka jingpynmih sniang haba ïa nujor bad kiwei ki District.
Kila batia ruh shaphang ka rukom ri sniang katkum ka juk stad ba mynta, da kaba ai nuksa lah ruh ban pynïoh ïa ki khun sniang da kaba leh ïa ka injection kaba lah ban pyntikna haduh 95 percent. Da kaba ong ba ka jingkiew ka kam ri jingri ka ai mynsiem ïa ka tnad ri jingri.
Kumba long mynta kila pynsngew hapoh ka jylla kiba bun hi ki im da ka kam rep kam riang, kumta ka jingwan jong ki scientist ha kane ka prokram kan ïarap shibuh eh ïa ki nongrep ba kin pynleit jingmut haka kam rep kaba lah ban pyndap bam ïa District da kaba ym donkam shuh ban shañiah nabar.
Ïa ka jingïalang la pynïaid da u Dr. R. Suchiang Subject Matter Specialist (AH & Vety) KVK Jaiñtia Hills, la pynphuh pynphieng shuh shuh ïa kane ka sngi da ki jingshad tynrai ba la shim bynta da ki samla ka Tuber kmai shnong.
