Ka Hynñiewtrep Youth Council (HYC) ha ka 15 tarik ïaiong 2025 ka la wan iakynduh ia u MP ka Rajya Sabha u Dr. W R Kharlukhi ha Ophis treikam jong ka NPP ha Lachumiere ba un kren lem haba ïadei bad ka jinglong jingman ha NEIGRIHMS.
Haba kren sha ki lad pathai khubor hadien ba la dep iakynduh na ka liang u President u Bah Roy Kupar Synrem u la ong ka jingwan kynduh jong ka HYC ia u MP ka Rajya Sabha ka dei halor ka jingbym hun ia ka jubab ba ki ioh na u Director ka NEIGRIHMS halor ki mat kiba ka HYC ka dawa halor ka jingiakynduh jingeh ki samla ha ka thung kam thung jam. Kumta ka HYC ka la wan iakynduh ia u MP ka Rajya Sabha ba un kren lem halor ka mat kaba ka HYC ka la shim.
Shuh shuh u la ong watla u dei u MP ka Rajya Sabha um dei ba jied ki paidbah hynrei la jied da ki nongmihkhmat kiba ki paidbah ki la phah ha Ïingdorbar bad kumta dei ki paidbah kiba jied ban long u nongmihkhmat hapoh Rayja Sabha.
U la bynrap ka Seng ka la iakren bad u MP bad pynsngew ruh halor ka jingkynduh jingeh ki khynnah samla khamtam ban buh 80 percent ia ki kynthei bad 20 percent ia ki shynrang ha ka kam nurse. U la ong ruh ka AIMS ka la lah ban wanrah ia ka policy ban pyntreikam 80 la 20 percent bad ki don bun ki institute ne ki tnad treikam jong ka sorkar India ba ki lah ban shim ia ka rai ban pyntreikam ia ka 80- 20 percent. Ka Seng ka pyrshah ia ka jingkren jong u Director ka NEIGRIHMS halor ka jingong jong u ba kam don kano kano ka institute kaba pyntreikam 80- 20 Percent, kumta ka Seng ka la aiti ia ki kot ki sla bad ka la phah ruh sha u Myntri ka peit ia ka tnad ka koit ka khiah jong ka sorkar India ba ki don ki institute kiba pyntreikam 80 la 20 percent.
