Ka kynhun jong ki nonghikai ba kynthup ia ka Meghalaya SSA School Association Central Body bad ka Meghalaya Fourth Teacher Association hynne ka sngi ka 15 tarik ïaiong ki la wan iakynduh ia u Vijay Mantri Commissioner & Secretary ka tnad pule puthi jong ka Sorkar jylla ban bud dien halor ka jingthmu ka sorkar ban shimti ia ki Skul SSA.
Haba kren sha ki lad pathai khubor na ka liang u Bah Aristole C Rymbai President jong ka Meghalaya SSA School Association Central body u la ong na ka liang ka tnad pule puthi jong ka sorkar jylla ka la phah shithi sha ki skul shimet jong ki SSA ba ki kloi ne em ban aiti ban pyniaid noh da ka sorkar, hynrei ki mih ki daw namar ka don ka jingbym shai haba iadei bad ka jingthmu jong ka sorkar ban shimti ia ki skul SSA, ki nonghikai MSSASA ki la pan por biang na ka sorkar haba iadei bad kito ki skul ki bym pat shai haba iadei bad ka jingthmu jong ka sorkar ban shimti ia ki skul SSA.
U la bynrap haba iadei bad kito ki skul kiba la kwah ban aiti noh sha ka sorkar ban shimti, u la kyntu ia u Commisioner ka tnad pule puthi ban pynkloi noh ia ki jingdonkam baroh.
Shuh shuh u la ong ia kito ki skul shimet ki bym kwah ban aiti ha ka sorkar kiba la kyntiew ia ka pule puthi ha ka jylla , u la kyntu ia ka sorkar ban ailad biang ia ki nonghikai ha kito ki skul ba kin hikai ha ryngkat ka jingmyntoi bad ka jingsiew kaba biang.
U la bynrap haba iadei bad kito ki skul ki ba duna khynnah bad kumjuh ki nonghikai, u la kyntu ia ka sorkar ban rah noh sha ki skul ki ba marjan kiba don ki khynnah skul bad kumjuh ki nonghikai.
Na ka liang u Commisioner & Secretary ka tnad pule puthi u la ong ba un sa khot ia ka jingialang ha kawei ka sngi ha ryngkat ka tnad pule puthi ban iakren sani bha haba iadei bad kine ki mat kiba ki nonghikai SSA ki ai jingmut sha ka sorkar halor ka jingthmu ka sorkar ban shimti ia ki skul SSA.