U Bah Wankitbok Pohshna, State General Secretary jong ka BJP Meghalaya haba kren sha ki lad pathai khubor ha Ophis treikam jong ka Seng u la ong ka Enforcement Directorate ka la Chargesheet pyrshah ia ki Nongialam jong ka Congress kynthup ia ka Sonia Gandhi bad u Rahul Gandhi haba iadei bad ka Case halor ka kot khubor National Herald.
U la ong ba ka Congress party ka dei ka party ka ba ïeng ha ka kynhun jong ki Gandhian kaba ialap na ka bynta ki kynhun rit paid bad kiwei kiwei.
Shuh shuh u la ong kumno ka Congress ka la leh ia ka case jong ka National Herald, u la ong ka National Herald ka dei ka kotkhubor kaba la pymih naduh ki por ba ka ri ka ialeh ban ioh ia ka jinglaitluid bad ia kane ka National Herald la seng da ki nongialeh laitluid ha kito ki Snem.
Shuh shuh u la ong ba ha kito ki Snem 5000 ngut ki la kynshew pisa, hynrei ka longïing jong ka Sonia Gandhi bad Rahul Gandhi ki pyndonkam bakla ia kine ki aiñ. U la ong ba ia kane ka kot khubor ki kynshew pisa kylla na ka Fund jong ka party ban pyllait ia kata ka ram kaba la kot sha ka 90 klur.
Katkum ka aiñ ka khang pyrshah ia kino kino ki Political Party ban khaïi pateng, ka Congress ka leh pyrshah bad bei pisa 90 klur ban pyllait ia ka National Herald na ka ram, hynrei la thied kylla da ka Company kaba kyrteng ka Young India Pvt Ltd, bad ia ka Young India Pvt Ltd la Seng da ki kynhun kumba 45 ngut bad 2 ngut na kita ki don ka bhah haduh 76 percent bad kita ki 2 ngut ki dei ka Sonia Gandhi bad u Rahul Gandhi.
U la ong ia ka Seng Congress la ialam da ki briew kiba don dak sniew , wat la ym pat rai pynrem, ngim pat lah ban ong ba la rai pynrem hynrei ki sabud ki don.