Ka jinglehniam lynti Diengphna ka long ka jingleh riewblei da kaba ki nongwan iashim bynta ki puson ia ka jingshah shitom bad ka jingiap jong U Trai Jisu Khrist halor ka Diengphna. La pynbynta ia kane ka jingleh riewblei bad mat puson ha ki 14 tylli ki jingjia lane ki jaka ba kongsan ka jingim U Jisu naduh kper Gethsemani shaduh lum Kalbari. Kane ka jinglehriewblei ka long kum shibynta ka jingrakhe ia ka sngi “Good Friday” ha Madan Parish Jowai, Marianhill.
Kine ki 14 jaka ki kynthup naduh ka jingpynrem ia U Jisu ban iap, la pynbah ha U Jisu ia ka Diengphna, ka jingkyllon U Jisu ha kaba shisien, U Jisu u iashem bad la ka kmie ba sngewsih, u Simon u iarap ia U Jisu ban bah ia ka Diengphna, ka Beronika ka ai rumar ha U Jisu, U Jisu u kyllon ha kaba arsien, U Jisu U kren ha ki kynthei Jerusalem, U Jisu u kyllon ha kaba laisien, la loit jubor ia ki jaiñ U Jisu, la sah narphna ia U Jisu, U Jisu U iap halor ka Diengphna, la pynhiar ia ka met U Jisu na ka Diengphna bad la tep ia U Jisu.
U phadar Hilarius Lamare, u Parish Priest ka shnat niam Jowai u kongsan jong ka jinglehñiam, haba kren ha kane ka sngi u ai ka mat puson ia ka jingieid U Trai Jisu, da kaba aiti ialade haduh ka jingiap na ka bynta ki pap, ki sang jong u khun bynriew.
La pynkut ia kane ka jingleh riewblei da ka Komunion bakhuid ha kaba da ki spah spah ngut ki paid riewngeit ki la iashim bynta ha ka iabam ka iasip ia u Kpu uba la pynkyntang kaba long ka met bad ka snam jong U Jisu Khrist. Kham ha shwa la don ka jingdoh ieid ia ka Diengphna bakhuid, ha kaba la wan ban doh ia ka Diengphna bakhuid naduh ki khynnah rit haduh ki Tymmen ki Kro.
