Ki Paidkhristan ha kylleng ka pyrthei man la u snem naduh ka sngi ba nyngkong ka jingmihpat u Jisu na kaba iap haduh mynta mynne ki rakhe ia ka sngi Paskha (ka sngi jingmihpat u Jisu) ban kynmaw ia kaei kaei kaba u Jisu u la leh na ka bynta ban pynim ia u khun bynriew ha shikhrum ka bneng shityllup ka pyrthei. U la wan longbriew sha kane ka pyrthei, u la shah shitom, u la shah iap bad u la mihpat na kaba iap.
Ka Parish Jowai kaba don ka Iingmane bah (Cathedral) ka jingtrei kaba dangiaid shakhmat ban pyndep shna ia ka. Ka Cathedral ka dei ïingsad Iingsunon bad ka Khet jong u Bishop ka Jowai Diocese. Ryngkat ka Balang Salonsar, ki paidriewngeit ka Jowai Parish hynne ka sngi (20/04/2025) da ki spah spah ngut ki la iatuid sha ka Shrine jong ka Saint Theresa, Marianhill ban rakhe ia ka sngi ka jingmihpat jong u Jisu na kaba iap.
Ha kane ka jingrakhe ia ka sngi ka jingmihpat bad ka jingjop jong u Jisu halor ka jingiap, ha ka por shiphew baje mynstep la don ka jingknia Mas Iukharist bakhuid (Solemn High Mass) ba la pynmynta da u Sohblei (Fr) Augustine Lamin, u sohblei synrop ka Shnat niam Jowai uba long ruh u Vice Principal ka Marianhill Higher Secondary School, Jowai. Hadien ka jingpule ia laitylli ki jingpule na ka Jynthoh bakhuid (Baible) la ioh ia ka jingkren (Homily speech) bad sam ia ka Ktien ka jong U Blei kaba sngewtynnat da u Sohblei (Fr) Augustine Lamin. Haba kren ha kane ka sngi u ong ba ka jingmihpat u Jisu (im biang) na kaba iap ka dei ka kam bad ka jingjia ka bakhraw tam kaba la pynlyngngoh ia ki briew bad ia ka bor jong ka Mariang (Natural Law) namar ba ym ju don koit u briew lane ka briew u ne ka ban mihpat na kaba iap kumba mihpat u Jisu met bad mynsiem. Ki riewkhraw jong ka pyrthei ki iap ym don ka jingmihpat, hynrei ia ka jingmihpat u Jisu na kaba iap, ki riewstad jong ka pyrthei bad ki jingthoh Baible ki iengsakhi shai kdar ba u Jisu u la mihpat na kaba iap.
Ha ka jingkren sneng kren kraw ia ki paidkhristan, u Sohblei (Fr) Augustine Lamin, u ong na ka bynta ki Khristan ha ka sngi Babtisma ki la rung ha ka jingtep jong u Jisu bad ki la mihpat sha ka jingim ka bathymmai bad u Jisu. Nangta u ong lyngba ka Babtisma ki Khristan ki kylla long ki Khun jong u Blei ha u Jisu Khrist bad haba ki long ki khun ki jong u Blei, ki long ki Nongiohpateng lem bad u Jisu Khrist. Shuh shuh u ong ka jingmihpat jong u Jisu ka ai jingkyrmen ia ki paidkhristan ba kin sa mihpat kumba mihpat u Jisu shisien ka sngi ong u Sohblei Augustine Lamin.
U Sohblei (Fr) Augustine u pynkut ia ka jingkren jong u da kaba ong “To ngin long ki Sakhi jong u Jisu uba la mihpat, ngin im, ngin sakhi ia ki jinghikai jong u ban im ha ka Hok ka sot, ha ka tipbriew tipblei, ha ka Akor ka burom hala iing hala sem, ha ka imlang ka sahlang ha ka shnong ha ka thaw, ha ka Balang bad ha khmat ka pyrthei katba lah ei kyntu u Sohblei Augustine.
Kumban shu pynkynmaw ha kane ka sngi, ha ka jingduwai ki ‘riewngeit, la duwai ruh na ka bynta ki jingthmu jong u Kpa bakhuid (Pope), na ka bynta ka Balang, na ka bynta ki Nongsynshar ri, na ka bynta kiba pang kiba shitom bad na ka bynta ka jingshong suk shongshngaiñ hapdeng ki para briew.
