-Yn trei kam biang ïa ka VDP, T.20,000/- ka kuna lada lap ïa kiba pynjulor ïa ka Wah Myntdu bad kiwei-
Ka Dorbar Shnong Khimusniang (DSK), Jowai ka buh ka jingpynkynmaw bad pyntip paitbah ba kino kino kiba ba don jaka ne ïing hapoh pud u sam jong ka shnong, kiba kwah ban Register ne leh Land Holding їa ki jaka ki puta ki jong ki, ki dei ban їoh shuwa їa ka NOC na ka Dorbar Shnong Khimusniang.
Kino kino kiba don jingthmu ban pyntrei їa kino kino ki jait kam, kum kaba shna їing, shna fencing, khlong khyndew da ka JCB, noh khyndew bad kiwei kiwei ki jait jingtrei kiba hap hapoh u pud u sam jong ka Shnong ki dei ban pyntip shwa sha ka ophis jong ka dorbar shnong bad ki dei ban їoh ruh їa ka NOC ha shwa ban trei ne leh їa kano kano ka jait kam.
Ha kaba їa dei bad ki nongthied jaka ne die jaka kiba hap ha hapoh u pud u sam jong ka shnong ki dei ban ai jingtip shwa sha ka Dorbar Shnong bad їa ka Dostabit їa die їa thied dei ban thoh da ka Shnong.
Kino kino kiba pynkheiñ ne kiba leh pyrshah їa kitei ki kyndon ba la kdew haneng la ki dei ki nongshongshnong ne kiba nabar shnong, ka Dorbar Shnong ka lah ban pynduh їa ki jingdonkam jong ki bad ban thoh ruh sha ki bor jong ka aiñ.
Ka Dorbar Shnong Khimusniang, Jowai ka lah ban pynkylla ïa ki kyndon aiñ na ka por sha ka por kat kum ki jingdonkam.
Ban wan rah ïa ka shongsuk shong shngaiñ hapoh ka Dorbar Shnong kala buh ïa ki kyndon jingmaham kiba la khang pyrshah ba ym bit ban їa shong dih kiad, dih drok, dih kynja bad kiwei kiwei de ki jingdih pynbuaid hapoh kali lane ban їa shongkai hapoh kali, ha ki jaka ba dum kiba hap hapoh u pud jong ka Shnong.
Ym bit ban їa khalai/їa shoh/їa dat ne kren їa ki ktien sih ktien sang hapoh u pud ka shnong.
Ym bit їa ki kali/Motor bike ban ñiah їa ka speed kaba palat їa ka 30 Km/Hr hapoh u pud u sam jong ka Shnong.
Ym bit їa ki kali ban pynheh їa ki sur jingtem ne pyndait da ki muffler ha ki silencer ha ki kali ne ki bike/Scooty.
Ym bit їa kino kino ki kali/bike/Scooty ba kin їaid neutral da kaba pynlip їa ki light haka por miet.
Ym bit ban bret ñiut kat sha ba lap hapoh u pud ka shnong.
Kino kino kiba pynkheiñ їa kitei ki kyndon haneng la ki dei ki nongshongshnong ne kiba na bar shnong kin hap ban siew ïa ka kuna Rs.5000/- bad ban aiti sha ka aiñ.
Ym bit їa kino kino ki kali /bike/Scooty ban pynїeng ha ki jaka ba la thoh No Parking ha baroh arliang surok, dei ban buh tang ha ka jaka ba la thoh (One Side Parking Only).
Yn shah ban pynïeng kali /bike/Scooty tang shipor ha ka por leit thied tiar dukan/dih sha dukan bad ha ka sngi Sunday por ba long Jingïaseng dei ban buh tang ha ki jaka ba kylluid surok ka bym pynwit (Block) ïa ka surok bad lada lap їa kino kino kiba pynkheiñ aiñ yn pyndait khnap ryngkat bad ki kyndon aiñ jong ka shnong da kaba kin siew ruh ïa ka fine Rs.500/- bad ban ai ruh sha ki bor jong ka aiñ.
Ka Dorbar shnong Khimusniang ryngkat ka jingïatrei lang bad ka JF&EPA (Jaiñtia Fishing & Environment Protection Association,) West Jaiñtia Hills, shi bynta ban ai jingïada ïa ka mariang kynthup ïa ki wah duid, wah myntdu, ki mrad khlaw, ki sim, ki doh um, kiba don hapoh u pud u sam jong ka shnong ka thaw baroh. Ka Dorbar Shnong Khimusniang ka la khang pyrshah ba ym shah ban khang jar/Tongsasi/Dat bom/theh dawai ïa ki doh um/kiba sait jaiñ bret Huggies, Diaper, bret jakhlia/khlong maw/sait kali bad pynjulor ha ka Wah Myntdu naduh Tre Ïongriang shaduh Band Moopiah bad lada lap їa kino kino kiba pynkheiñ ïa kine ki kyndon aiñ kin sha summon da kaba kin siew ruh ïa ka fine Rs.20,000/- tyngka bad ban ai ruh sha ki bor jong ka aiñ.
Ka Dorbar Shnong Khimusniang ka la pyntrei kam biang ïa ka Village Defence Party (VDP) kaba la ju don ha ki snem kiba mynshuwa, ka dei ka seng kaba la ithuh da ka sorkar ha ryngkat ka jingïatreilang bad ka Dorbar Shnong Khimusniang. Kane ka long ka jingpynbna paitbah ban husiar ba ka VDP kan trei ïa kam nangne sha khmat naduh ba la pynmih ïa kane ka khubor.