Ka tnad Pule jong ka Sorkar Jylla ha ka 21 tarik ïaïong 2025 ka la pynlong ia ka jingialang bad ki kynhun jong ki nonghikai SSA ban iakren haba iadei bad ka jingpan shimti ka tnad pule puthi jong ka sorkar ia ki skul SSA.
Ha kane ka sngi la iadon lang da u Commisioner Secretary ka tnad pule puthi u Vijay Kumar Mantri, ki ophisar ka tnad pule puthi bad ki nonghikai SSA.
U Bah Aristole C Rymbai, President jong ka Meghalaya SSA School Association ha ka jingiakren bad ki lad pathai khubor u la ong ka tnad pule jong ka sorkar ka la khot ban iakren ha ka sien ba 5 haba iadei bad ka jingpan ka sorkar lyngba ka tnad pule puthi ban shimti ban pyniaid ia ki skul SSA.U la ong ki Community school jong ki SSA kiba lah ban aiti sha ka sorkar na ka 3000 hajar tylli ki skul ki long 2000 hajar tam ki skul ki la pynkhreh noh ban aiti ia ki skul SSA sha ka sorkar. Ki skul shimet bad ki skul niam kiba la submit sha ka sorkar haduh mynta na East Khasi Hills ki long 23 tylli.
Shuh shuh u la ong haba iadei bad kito ki skul SSA ki bym shim kwah ban aiti sha ka sorkar na ka liang ka sorkar kan sa phah da ka jingthoh ha ryngkat bad ki jingpynshai bad kan ai por haduh 15 tarik u May 2025. U la ong ka sorkar ka la ai ka jingpynshai haba iadei bad ka jingshimti ia ki skul kan kynthup naduh ki skul Building ki jaka la ki dei ki skul shimet ne ki skul niam bad kane ka dei ka jingpynshai na u Commisioner Secretary ka tnad pule puthi.
Haba iadei bad ki skul shnong ka sorkar ka dei ban shimti beit ia ka skul shnong khnang ba kan long ka jingmyntoi ia ka skul kaba don ha ki shnong.
Haba iadei bad ki nonghikai na ka liang ki nonghikai SSA ki la iakren sani bha ha kaba ki la pynpaw ha ki skul kiba duna Enrolment kin rah noh ia ki nonghikai sha ki jaka ki ba don Enrolment bad ia kane ka mat yn pyndep ha u bnai May.
