Ka Jaiñtia Youth Federation (JYF) Central Boby kala phah da ka jingthoh sha u Chairman ka Jaiñtia Hills Autonomous District Council (JHADC), halor ka jingdonkam ban pyntreikam noh ïa ka Website jong ka Council kaba la sangeh treikam naduh ka 3 tarik u Kyllalyngkot, 2019.
Kane ka jingkyntu ka seng ka long namar ka jingdawa jong ka por ban ïaid katkum ka juk ba mynta, khnang ban kham pynsuk ïa ki paidbah kiba ïadei kam bad ka Council lane ki lad jingtip kiba lah ban ïoh na ka Council.
Shuh shuh ka seng ka ong lada ka Website jong ka JHADC kan treikam kan ïarap shibun eh ïa ki khun samla ba kin ïoh jingtip naduh ka rukom treikam ka Council, ki lad ïohkam ïoh jam, ka riti ka dustur, ka rukom pyntreikam ïa ki skim paidbah, ki Festival bad ki jingïathuh khana ba kyrpang jong ki longshwa.
Nalor kine ka seng ka dawa ban buh ïa ka map jong ki Constituency, ki Elaka bad ki nongmihkhmat kiba dei ki MDC jong ki Constituency bapher bapher. Kumjuh ruh ban pyntreikam ïa ka e-service haba donkam ban downloads ïa ki License application nalor kiwei de.
La donkam ruh ban pyntrei kam ïa ka rukom siew pisa lyngba ka online UPI kiba kynthup ïa ka Gpay, PhonePe bad Netbanking ha ki Receipt cell ka Council naduh ki stamp, license, professional tax bad kiwei de, la ong ka seng.
Kumba ïaid ka por ka seng ka kyrmen skhem ba kane ka jingkyntu ïa ka JHADC kan long kaba sei soh ha kine ki sngi ban wan, khnang ba kan long ka jingmyntoi ïa kiba bun ba lang.
