Ka Joint Action Committee (JAC) jong ki khun ki hajar ka Hima Sohiong hapoh ka jingialam jong u Bah B. Shabong Chairman JAC, ki la leit ban ïakynduh ia u Bah Shemborlang Rynjah, CEM KHADC ban iakren bad buh Dorkhas halor ka khubor ba ka Shnat Hima Nongwah Mawtamur ka la leit ban aiti sop sop ia ki jaka sha 65 tylli ki kynhun jong ka Jylla Assam ha ka 22 Lber 2025.
Ia kane ka khubor ba la saphriang ha ki rynsan Social media, u Bah Shabong u la ong ba kane ka long kaei kaei ka bym lah ban pdiang bad lah ruh ban kynnoh ba ka dei ka kam be-aiñ. U la ai jingmut ia u CEM ba dei ban pan jubab ia ki briew ka Mawtamur kiba la leh buhrieh ia kane ka kam.
Shuh shuh u iathuh ba ha ka jingiakynduh bad u CEM la bthah ba dei ban shim khia bad pan jingshai na ka Hima Nongwah bad Hima Sohiong la ai jingmut ruh ba dei ban pynkut bad weng noh ia katei ka jingai jaka sha kitei ki briew, dei ruh ban pynshitom ia ki briew ba don kti kaba ktah ia ka burom jong ka Hima bad Jylla baroh kawei.
Lah ban pynkynmaw ba ka Mawtamur kadei ka jaka ba la ioh biang na ka Assam hynrei mynta ia kane ka jaka la aiti biang sha Assam khlem ka aiñ.
“Kam dei eh tang ka jingialeh pyrshah ia ka ‘Meghalaya Land Transfer act’ hynrei ka la dei ka direk atak ia ka Meghalaya Transfer act 1971, balei ki dang leit aiti sha ki bar Jylla haba la don ka aiñ bym lah ban aiti sha kiwei ki briew nabar jylla” buh jingkylli u Bah Shabong ia ki briew ba leit aiti sha ki briew ka Assam.
U Bah Shabong u la pyntikna ba u CEM u la Kular ban shimkhia ha kaba iadei bad kane ka kam “ngi kyrmen ba un shimkhia ia kane namar kane kam ktah tang ia ka Hima hynrei ka ktah ia ka Jaitbynriew bad ia ka Jylla hi baroh kawei.