Ki Nongïalam ka Hynniewtrep Youth Development Council (HYDC ) ha ka 29 tarik ïaïong ki la leit ïa kynduh ia u Principal Secretary ka Labour Development jong ka sorkar Meghalaya u C. Songate, IRS ban kyrpad ia u ban pyntreikam noh ia ka Minimum wages bad kynthup lang ruh ia ki skul shimet, bad ki Hospital.
Na ka liang u President ka HYDC u Bah Wyraiwan Sohtun haba kren bad ki nongthoh khubor u la ong ka seng ka kyntu ban pyntreikam ia Minimum Wages kaba la pynmih da ka sorkar jylla ban pynkiew ia ka bainong ki nongtrei bylla ha ki company ki factory bad ha ki dukan bapher bapher khnang ba kan long ka jingmyntoi ia ki nongbylla sngi.
Ha ka jingiakynduh bad u Principal Secretary ka seng ka buh jingkylli ba ka tnad kan leh kumno ia ki karkhana kiba ai kam, kim lah ban siew ia ka minimum wages katkum ba ka sorkar ka la buh na ka liang jong u Principal Secretary u la ong ba ki hap ia pynbeit kito ki ba ai kam bad kito kiba ioh kam. Ka seng ka buh jingkylli kan myntoi aiu ia ka sorkar ban wanrah ia kane ka aiñ lada kim lah ban pyntreikam ha madan, ka Seng ka kren shai ba kam don jingmut ban wanrah ia kane ka aiñ lada ki nongbylla kim ioh ia ka bainong kum ba la buh.
Shuh shuh u la bynrap kane ka aiñ kam pat urlong katba ym pat mih ïakhih u paidbah sha madan. Ka seng shen kan sa pynlong da ka jingialang paidbah ha Mothphran na ka bynta ban pynsngewthuh ia ka hok jong ki paidbah bad ban pynbor ia ka sorkar ban pyntreikam ia kane ka aiñ Minimum Wages.
