Ka Sarot I Man (SIM), ka group jong ki 11 ngut shiparalok, ha ka 30.04.2025 ka la wan ha Shnong Panaliar, Jowai ban ai jingiarap. Ka Chnong Panaliar lyngba ka Executive Committee jong ka, ki la pdiang sngewbha da kaba pynlong ia ka jingialang ba lyngkot.
Ia ka jingialang la pyniaid da u Assistant Waheh Chnong, u Arwotki Sumer, uba la iaroh ia ka Sarot I Man da kaba ong ba, ka burom ba wanrah ki dkhot ka SIM kan ym kut tang ha ki, ka kynthuplang bad ka shnong ruh. Namar baroh ki dkhot jong ka, kidei ki khun jong ka shnong, kiba trei borbah ha ka shnong ruh, naduh u Waheh Chnong, u badei uwei na ki dkhot jong ka.
Laioh ka jingkren na ka liang ka shnong da u riew rangbah ba latrei slem bha ha ki kam shnong bad mynta u long kum u Executive Member, ma R. Thawmon Bamon.
Ha ka jingkren u ma Bamon, u la iaroh shikatdei eh ia ka Sarot I Man. Kane ka dei shisha ka group kaba iohi jngai na ka bynta ka bha ka miat ha ka imlang sahlang. U la ong ba, kumba ka shnong Panaliar, ka la pynmih ia shibun bah ki Sap ki Phong ha ki khun jong ka, ymtang ha kawei ka laiñ, ha kiba bun ki laiñ naduh ka pule ka dangle, ka la pynmih ia shibun ki Doctors ki Engineers bad kiwei kiba la treikam sorkar. Kadon shibun ki Business men, ki Nongrwai, nongthaw jingrwai, ki Film Director bad kiwei kiwei de.
Kumta kane ka group Sarot I Man ruh, ba kidei ki khun ka shnong Panaliar, ki laioh ia ka Sap ba pura ha kiba bun ki liang, la ong shuh shuh u ma Bamon. U la kyrkhu kyrdoh ia ka group ha kajuh kapor u la ong, kaba sngewtynnad, kadei ba u latip ba kane ka group, ka shait ai jingiarap sngewbha da ka Snam sha ka Blood Bank. To u Blei un don ryngkat bad phi ha baroh ki liang, u la pynkut.
U Aziz War, MA, LLB, DIM. ba ju trei kum u Functional Manager ka DCIC, Jowai, ha kajuh kapor, udei u dkhot ba radbah ka Sarot I Man. U la ai ka jingbatai shaphang ka jingsdang bad katto katne ki mat ba sngew donkam. U la iathuh ba lasdang ia ka Sarot I Man ha ka 25.12.2020 ryngkat lang bad ka Motto ne Imsngi -“KUNE HA I DÆ”. U la ong ba ka SIM, ha ka hi, baroh ki Dkhot kidei ban don kajuh ka kyrdan, wat lada ki iapher ha ka kyrdan pule dangle ne kyrdan trei kyrdan ktah, kim ju don ka jingsngew iapher uwei na uwei. U la iathuh ba ha ki hi, kim da sngew donkam ban thung ne jied ia u President ne Secretary namar baroh ki ialong kajuh. Ha ba khot ia ki jingialang, uno uno u dkhot ba kam ban long ha ïing jong u, ma u hi, u dei u nongpyniaid bad ma u hi, un long u recorder. Kaba sngewtynnad ka long ba u ma A. War u la ong ba, ka SIM hi kan ym iashimbynta ha ki kam saiñ pyrthei, hynrei kan ym khanglad ia ki dkhot jong ka, ka mon laitluid ka jong ki bad ruh kin ym pan jingiarap na kiwei ba kin ai iarap ia kiba donkam jingiarap. Ki pynlong ka jingia kynshew para maki, la ha kano kano ka dur ruh bad ki leit ai jingiarap da ka lynti kaba ki lah ban ai.
U ma War u la ong ba ka SIM kadon ka jingmut naduh mynshuwa ban ai iarap sha ka shnong Panaliar, tangba kim sngew iahap ban ai da ki sopti kumba ki ai sha kiwei ki shnong, namar ba kane ka shnong ka dei ha sor. Hynrei, sngew donbok ba kiba bun na ki dkhot ki long ki nongtreikam shnong hapoh ka shnong Panaliar, ki la iohi ka ei ka jingdonkam ba ha khmatduh ka shnong bad ka long ruh kaba lah ban ai na ka SIM.
Te mynta sngewknem ba la poi lynti ban ai sha ka shnong da kane ka PODIUM ne PULPIT baka shnong kan ioh ban pyndonkam. U la ong haoid, ka jingai kat ia ka shnong, kalong kaba rit ha khmat jong ka, hynrei kumba ong ka ktien nongwei ” Every gift though it be small is in reality great if given with affection”, da kata ka jingsngew ka Sarot I Man, ka la kyrpad ia ka shnong ban pdiang lada ka long ha kano kano ka dur ruh, kren pynkut u ma A. War.
Laioh ia ki kyntien ai khublei na u Marryngkat Syngkon, General Secretary ka Chnong Panaliar bad la pdiang ia ka Podium na ki dkhot ka Sarot I Man da ki Executive Member ka shnong ha ka jingialam u Assistant Waheh Chnong, ma Arwotki Sumer bad u General Secretary.