Ka All Meghalaya Domestic Workers Union kaba don hapoh ka shatri jong ka National Domestic Workers Movement ha ka 1 tarik Jymmang kaba la ioh jingithuh ha ka tnad labour jong ka sorkar jylla ka la wan pyntip paidbah ha Shillong Press Club na ka bynta katto katne ki mat jong ka kynhun na ka bynta ki nongtrei bylla ïing briew.
Haba kren sha ki lad pathai na ka liang ka Kong Rachel Mawthoh nongialam jong kane ka kynhun ka la ong ka jingmih kane ka kynhun hapoh ka jylla ka long ban ïeng ban pynioh ia ka hok ban iada, ban ioh ka jingsiew ba biang bad ban ithuh ia ka kam ba ki trei na ka bynta ka roi ka par jong ka imlang ka sahlang.
Shuh shuh ka la ong ka jingdawa jong kane ka kynhun ka long ban don kawei ka board jong ki Domestic Worker ki nongtreibbylla ïing briew namar la palat 25,000 ngut ki nongtrei ïing briew kiba la pynrung kyrteng ha kane ka kynhun. Ka la kyntu ruh ia ki nongtrei bylla kiba bylla shabar ka jylla ba kan pynrung kyrteng ha kane ka kynhun khnang ba kan long ka jingmyntoi na ka bynta ban iada ia ki bad ban pynioh ia ka hok jong ki, Ki jinghikai ha ki ba bun ki kam bad kiwei kiwei.
Shuh shuh ka la ong ha kine ki kyndiat bnai ba la dep ka la don ka jingshah shoh jong kawei ka nongbylla ïing briew ha Nagpur, bad ki ai khublei ia ka KSU kiba la kloi ban iarap ban pynioh ia ka hok na ka bynta ka nongbylla ïing briew kaba shah shoh ha Nagpur.
Ha kaba khatduh ka kyntu ia ki nongtrei baroh ban pynrung kyrteng ha ka All Meghalaya Domestic Workers Union na ka bynta ban ioh ia ka jingiada bad ka hok ba ki trei kum ki nongbylla.