Ka Jaiñtia Students’ Union (JSU) Jowai Circle mynta ka sngi 1 tarik u Jymmang hapoh ka jingïalam u President, samla Borntifulson Rupon kila leit jurip ïa ka surok Urkhla kaba ïaid sha ka jaka pyllang umbam (Water Treatment Plan) jong ka tnad P.H.E Electrical Division Jowai.
Ka seng kala ïoh jingtip ba katei ka surok ka hap hapoh ka jingpeit jong ka tnad PHE Electrical Division, hynrei la ieh sah khlem don shuh ba maramot da ki phew snem mynta, bad kala don hapdeng ka jingjulor bad ki jingsniew shaba palat.
Kiba bun na ki nongshong shnong kiba sah sha kitei ki bynta jong ka surok bad kiba leit trei sha ka jaka pyllang umbam (Urkhla) kila mad shibun ki jingeh khamtam haka por slap namar ka jingktieh jong ka surok.
Halor kane ka seng ka pynpaw ka jingsngewkhia ban ïohi ïa utei u surok hapdeng ka jingjulor bad ka jingdap ktieh, da kaba ong ‘kumno wat hapoh ka sor Jowai dang don kum kitei ki surok ba shah ieh beiñ bad kiba la sniew shaba palat, kumno pat ïa ki surok kiba don sha kiwei de ki jaka’ la buh jingkylli ka seng.
Na ka liang ka JSU Jowai Circle ka kyntu jur ïa ka tnat P.H.E bad khamtam ïa u MLA ka thaiñ ba kin leh noh ïa kaba donkam naka bynta katei ka surok, khnang ban long ka jingmyntoi ïa kitei ki nongshong shnong ka thaiñ.
