-Pynthikna ia ka jingtreikam kaba iaid beit iaid ryntih jong ki jingshakri ba kongsan kum ki hospital, ki kam pynlip ding bad kiwei kiwei; pynthikna ka jingpynbiang khlem jingthut ia ki mar ba kongsan-
U Myntri kam pohïing ka sorkar pdeng uba dei ruh u Myntri ka tnat ïatreilang, u Amit Shah, u la pynïaid ïa ka jingïalang peit bniah ïa ka jingshngaiñ ha New Delhi bad ki Lieutenant Governor bad ki Myntri Rangbah jong ki jylla khappud kiba ïajan bad ka Pakistan bad ka Nepal. Ha kane ka jingïalang la ïashim bynta lyngba ka video conferencing da ki Lieutenant Governor jong ka Jammu and Kashmir bad Ladakh, ki Myntri Rangbah jong ka Uttar Pradesh, Uttarakhand, Punjab, Rajasthan, Gujarat, bad West Bengal, bad u nongmihkhmat na ka sorkar Sikkim. Ki heh ophisar na ka Tnad kam pohiing (MHA), kiba kynthup ia u Union Home Secretary, Director of Intelligence Bureau (IB), Director General of Border Security Force (BSF), bad Director General of Central Industrial Security Force (CISF), ki la iadonlang.
Ha katei ka jingialang, u Myntri kam pohiing ka sorkar pdeng u Amit Shah u la ong ba hadien ka jingthombor ba shyrkhei jong ki lehnoh ha Pahalgam, Kashmir, ha ka 22 tarik u Iaiong, 2025, u Myntri Rangbah duh Narendra Modi u la ong ba ka ri kan ai ia ka jubab kaba biang ia ki nongleh kam sniew bad ki nongkyrshan ia katei ka jingthombor. U Myntri kam pohïing u la pynpaw ka jingsngewnguh ïa ka jingkut jingmut bad ka rai ba skhem jong u Myntri Rangbah duh Narendra Modi ha kaba ïadei bad ka Operation Sindoor. U la pynpaw ba ka Operation Sindoor ka dei ka jubab kaba biang na ka Bharat sha kito kiba nud ban tuklar ïa ki khappud jong ka India, ki shipai, bad ki nongshong shnong. Baroh ki Myntri Rangbah bad ki Lieutenant Governor kiba don lang ha kane ka jingïalang ki la ai khublei ïa u Myntri Rangbah duh ka ri u Modi bad ïa ki lai tylli ki kynhun shipai na ka bynta ka jingjop jong ka Operation Sindoor.
U Amit Shah u la ong ba ha ka miet jong ka 6-7 tarik u Jymmang, 2025, ki shipai India ki la ther ïa khyndai tylli ki jaka ba kyrpang kiba ïadei bad ki lehnoh, da kaba pynjot ïa ki jingdon jingem jong ki. U Myntri kam pohiing u la ong ba ha ka operation ba la leh da ki shipai India, ki jaka ai jinghikai ia ki lehnoh, ki jaka buh tiar ialeh, bad ki jaka rieh jong ki seng kum ka Lashkar-e-Taiba, Jaish-e-Mohammed, Hizbul Mujahideen, bad kiwei kiwei ki kynhun lehnoh la pynduh pyndam syndon.
U Amit Shah u la ong ba dei ban peitngor bha ia ki jingpynbna pyrshah ia ka ri da ki briew ha ki social media bad kiwei kiwei rynsan pathai khubor bad dei ban shimkhia kloi da kaba iatreilang bad ki sorkar jylla bad ki kynhun treikam jong ka sorkar pdeng. U Myntri kam pohiing u la ong ba dei ban pyrshang katba lah ban pynneh ia ka jingiakren kaba khlem jingeh bad dei ruh ban pynkhlaiñ shuh shuh ia ka jingpahara ia ki jaka ba lah ban shah ktah.
U la kyrpad ia ki jylla ba kin sangeh noh ban pynsaphriang ia ka jingtieng kaba khlem da donkam ha ki paidbah bad ban shim ia ki sienjam ban pynsaphriang ia ka jingsngewthuh sha ki paidbah pyrshah ia ki khubor hamsaia. U la ong ba dei ban pynkhlain shuh shuh ia ka jingiatreilang hapdeng ki bor synshar ha ka thaiñ bad ki shipai.