U District Magistrate ka West Jaiñtia Hills District, Jowai u Abhinav Kumar Singh, IAS, mynta ka sngi 8 tarik u Jymmang ula pynjari syndon da ka CURFEW hapoh ka kyndon 163 BNSS ka ban treikam naduh ka por 8 baje mynmiet haduh ka por 6 baje mynstep hapoh ka jingjngai kaba 200 metres na u Zero Line (International Border).
Lyngba kane ka hukum la mana ïa ka ïaid ka ïeng jong ki paidbah ha kitei ki bynta khappud lane ban jam sha shilliang khappud bad ka Ri Bangladesh lane ban rung shapoh ka Ri India.
La khang pyrshah ïa kino kino ki jingïalum paidbah palat ïa ka san (5) ngut shaneng lane rah ïa ki tiar pynmynsaw kum ki dieng ki maw hapoh kitei ki bynta khappud bala mana.
La khang pyrshah ïa ki nongsalan tuh ïa ki mar ki mata naduh ki masi, ki blang, kwai tympew, ki dohkha (ktung), ki jingdih kum u duma, biri, cigarettes bad kiwei de.
Kane ka hukum kan treikam mardor naduh bala pynbna ïa ka mynta ka sngi 8 tarik u Jymmang 2025 tad haduh ban da pynbna da kumwei pat.
La pyntreikam ïa kane ka hukum ka long hadien ka jinglong jingman bad jingbym shongsuk jong ka ri, ha kaba la ïoh jingtip ruh ba ki don ka jingrung tuh pathar ha ki jaka khappud bad ka Ri Bangladesh naduh ki kynhun lehnoh, ki nongkhaïi tuh bad kiwei de ki kam beaiñ.
La ïathuh ba kane ka jingïoh lad ban rung tuh ha ki bynta khappud dei na ka daw bym pat dep ka jingker sainar siah kaba lah ban wanrah ka jingma ia ka ri, ha kaba ki lah ban leh ia ki kam thombor jong ki ha ki por mynmiet myniong.
Shuh shuh u District Magistrate ka WJH ula pyntip ba la pyntreikam ïa kane ka hukum kum ka lad ban wanrah ïa ka jingshong suk shong shngaiñ hapoh ka District, ha ka jylla bad ka Ri hi baroh kawei.