Ka Meghalaya Commercial Truck Owner and Drivers Association (MCTODA) Jaiñtia Unit, mynta ka sngi 9 tarik u Jymmang kum ka dak ban burom ïa ki bor pynïaid District naduh ki DC bad kymjuh ïa ki SP jong ka East bad West Jaiñtia kila rai ban sangeh shwa ïa ka jingïakhih (indefinite Strike) kaba la sdang naduh ka 6 tarik u Jymmang, 2025.
Ka jingsangeh ïakhih jong ki ka long halor ka jingkular jong ki bor District hadien ka jingkhot ïakynduh ïa ki nongïalam ka (MCTODA) mynta ka sngi ha Khliehriat, da kaba pan por hapoh 10 ïa ki ban pynbeit bad ki trai jong ki Kharkhana Cook kiba don hapoh ka Ri-Lum Jaiñtia.
Shuh shuh katkum ka jingdawa ki nongñiah bad ki trai trok ka long ban pynkiew ïa ka bai kit jong ki na ka 1400/- tyngka sha ka 2500/- tyngka shiton, hynrei ïa kane ka dor ka dang ïaid mynta hapdeng ka jingïakren bad ki trai Cook la ki lah ne em ban siew ïa katei ka dor.
Katba ïa ka rukom pynkit ïa u Cook la rai ban ïaid noh salonsar da u line khnang ban ïoh jingmyntoi ïabaroh. Na ka liang u President ka Meghalaya Commercial Truck Owner and Drivers Association (MCTODA) Jaiñtia Unit, u ma Heibormi Pariat, u ong kane ka jingsangeh shwa shipor ïa ka jingïakhih ka long shi bynta ban ap ïa ka rai ba khadduh la ka long kaba seisoh ne em, hynrei lada kim ïoh katkum ka jingdawa kim banse ban shim biang ïa ka jingïakhih kaba tyngeh. Ïa kane kila shim lang ïa ka rai ha ka jingïalang kaba la long ha Mawryngkneng ha ryngkat ki nongïalam jong ka Meghalaya Commercial Truck Owner and Drivers Association (MCTODA) Central Boby.