Ka Women’s Welfare Committee (WWC) jong ka Loomkyrwiang Dorbar Shnong, Jowai kum ka dak ban kymmaw burom ïa ka sngi kyrpang jong ki longkmie ne ka ‘Mother’s Day’ ha kane ka 10 tarik u Jymmang kala pynlong ïa ka jingïakynduh lang ha Dorbar Hall jong ka shnong.
Ha kane ka sngi nalor ki khun samla ka shnong, ki longkmie la wan ban sakhi lang da u ma u A. Andrew Shullai, MDC-JHADC kum u kongsan, haka jingdonlang u ma Lammat-OO Laloo, Waheh Shnong Loomkyrwiang, u ma Chibor Najiar, Adviser LDC bad u ma Daioolang Pakma, Asst. Waheh Shnong LDC.
Ïa ka jingïalang la pynïaid da ka Samhakani Laloo, Secretary WWC Loomkyrwiang kaba la ai ki kyntien lamkhmat ha ka jingïadei bad kane ka sngi Mother’s Day, la ïoh ruh ka NguhBlai da ka Wandaka Laloo, ka jingkren pdiang na ka Heiioomitre Pakma bad ka jingkren ai mynsiem shaphang kane ka sngi ba kyrpang da ka Anikaru Laloo bad ka Dengsuk Laloo.
U ma Lammat-OO Laloo haba ai jingkren ula ai ka jingïaroh ïa ka Women’s Welfare Committee ka Dorbar Shnong kaba la shimkhia ban pynlong ïa kane ka prokram hapoh ka Shnong, kaba long kum ka jingburom ïa ki longkmie kiba don hapoh ka shnong, ula kitbok ïa kane ka seng ba kan dang ïaibteng ban ai ka jingshakri kaba bha tam haka imlang ka sahlang ha kine ki sngi ban wan.
Katba na ka liang u kongsan ma A. Andrew Shullai, ula pynpaw ka jingsngewnguh ban don bynta lang ha kane ka prokram ba la pynlong da ka Women’s Welfare Committee LDC, kum shi bynta ban pynkhraw shuh shuh ïa ka burom jong ka jinglong kmie.
Ula ong ka kmie ka don ka jingkit khlieh kaba khia bha na ka bynta ki khun ki kti bad kaba pyndep hok ïala ka kamram na ka bynta ki khun ki kti naduh ka jingpynbiang ïa ka bam ka dih, ka kup ka sem, ban ïalam lynti ïa ki ha ka akor ka burom ban suk ka lashai la shisngi, ha kaba khadduh u ai ka jingïaroh bad kitbok kitrwiang ïa baroh ki longkmie ha kum kane ka sngi ba kyrpang jong ki.
Ha kane ka sngi ka Women’s Welfare Committee, Loomkyrwiang kala pynkup burom kumjuh ïa ki longkmie ka shnong kiba la kynjoh 60 snem ka rta shaneng bad kiba la synñiang ha ka imlang ka sahlang na ka bynta ki kam babha. ïa ki khusnam la sam da u ma Andrew Shullai, ma Lammat-Oo Laloo, ma Chibor Najiar bad u Daioolang Pakma.
