Ka ophis jong ka Deputy Commissioner East Khasi Hill Shillong hynne ka sng ka 12 tarik Jymmang 2205 ka la pynbna ba na ka liang ka ophis kan iarap ia ki samla thep kam Shipai da kaba kin ai da ka jinghikai ne ka Pre Recruitment Coaching bad ka Training na ka bynta ki samla kiba thep kam shipai lyngba ka Agniveer ha ka Indian Army ka ban sa long ha kine ki sngi ki ban wan ha ophis jong ka deputy Commissioner.
Haba kren bad ki nongthoh khubor ka deputy Commissioner ka East Khasi Hills District ka Kong RM Kurbah ka la ong ba ka Ophis ka kwah ban iarap ia kito ki samla kiba kiba thep kam shipai ban wan sha khmat sha ka jingai jinghikai ka ban long kumba 30 haduh 45 sngi.
Ka kong Kurbah kala ong ba ka jingmih jong ka ophis sha khmat ban iarap ia kine ki samla ka long namar ka iohi ba ki duna bha ki samla kiba thep kam shipai na ka dong bad ka thaiñ ka jong ngi, kane ka kam ka long kaba kordor kaba iada ia ka ri bad shimet ruh ka don bun ki jingmyntoi kiba kin ioh. Ka la iathuh ruh ba na ka liang ka ophis ka la dep ban ai jinghikai ia ki samla ha kine ki snem ba la dep kumba 200 ngut bad kumba 85 ngut ki la pass ia ka exam bad 35 ngut pat ki la ioh ban rung kam shipai lyngba ka Agniveer.
Na ka liang u Bah Sebastian Marbaniang u shipai u ba la shongthait na ka kam haba kren ha kane ka sngi u la kyntu ia ki samla na ka jylla ban mih sha khmat ban ia khun ia kane ka kam, ka ban long ka jingmyntoi shibun na ka bynta ka jong ki. Une u Rangbah u la iathuh ba ki samla kiba 17 snem shiteng haduh 21 snem ki lah ban thep ia kane ka kam shipai bad hadien ba ki ioh ban trei ha kane ka kam shibun ki jingmyntoi kin ioh ym tang ka tulop kaba ki ioh hynrei ki wei ki wei de ki jingmyntoi. U la ong ba ha kane ka kam ka don shibun ki bynta.
U bah Marbaniang u kyntu ia ki kmie ki kpa ban ai mynsiem ia ki khun ban mih ban iakhun ia ki kam shipai, ym ban khang lad ia ki. U la ong ruh ba ka ophis jong ka DC bad na ka liang ka jong u kum u ophisr jong ka Zila Sainik Welfare officer u long uba kloi ban iarap ia ki.
Na ka liang u Bah Shanborlang Warjri, ADC haba kren ha kane ka sngi u la kyntu ia ki samla ban wan register ha DC ophis ha ka kamra 319 haba iadei bad kane ka kam shipai Agniveer bad ka ophis jong ka DC kan sa pyntip haba iadei bad kino kino ki kam ba lait haba iadei bad ki kam shipai lyngba ka Massage ne ka Whatsapp.