-Haduh mynta don 150 tylli ki post ba thylli, kin dang don shuh shuh, ong u ma Wailad-
U ma Wailadmiki Shylla, MLA ka Jowai Constituency mynta ka sngi Thohdieng ula leit ban wad jingtip na ka ophis u Deputy Commissioner ka West Jaiñtia Hills District halor ka jingsahkut ka jingthepkam bapher bapher hapoh ka jingpynïaid ka District Selection Committee (DSC) jong ka WJHD.
Ha kane ka jingleit wad jingtip jong u MLA ïa kane ka rukom thung kam hapoh ka District ula don jingthmu ban khot jingïalang bad ka DSC naduh kine ki sngi bala dep namar ka jingslem palat ban pyndep ïa ki Advertisement bala dep khot da ka DSC.
Haba kren sha ki lad pathai khubor ha DC ophis Jowai, u ma Wailad ula ong ki don ki post kiba la sah da ki bun snem naduh u snem 2017 kum kawei ka post ‘Lady Supervisor’ kaba dang don ha Court mynta, nalor ka post ‘LDA’ 49 tylli kaba dang sah sa ka result, ka kam ‘Sericulture Demonstrator’ 14 tylli, ‘Gram Sevak’ 4 tylli, ‘Gram Sevika’ kawei, na ka bynta kine ula pyntip ba ïa ka result yn sa pynbna ha kane ka sngi nyngkong jong ka taïew ban wan, la kumno kumno kin pyndep ïa ki Interview bad ka posting hapoh u July 2025.
Ula ong ka daw jong ka jingsah kut ki post bad ka jingslem ban pyndep ïa ki ka long na ka jingpyntreikam ïa ka roster system hapoh ka jylla.
Na ka bynta ki kam hapoh ka Grade-IV kaba don 92 tylli ki post yn pyndep hapoh u September jong une u snem 2025 naduh ka Written, Interview bad ka appointment letter.
Kiwei de ki kam bala dep khot Advertisement ha une u snem 2025 bad kiba dang sah ki long ka kam Weaving Demonstrator kaba 2 post, Ka LDA 34 post, Male Supervisor shi post, Gram Shevak 3 post, Gram Sevika 2 post bad Copyist shi post, kaba sah sa ka Written Exam ïa kaba yn pyndep hapoh une u snem.
Ha ka jingwad jingtip katkum ki shithi bala dep phah sha ki tnad sorkar hapoh ka District baroh ki don haduh 150 tylli ki post kiba donkam (Vacant), hynrei kum u MLA ula pyntikna na kine ki don ruh ki post kiba dang sah bad ïa kane un sa wad jingtip shuh shuh.
Ula pyntip ha kane ka 26 tarik mynta u bnai na ka liang u DC un khot ïa ka jingïalang bad ki tnad sorkar bapher bapher hapoh ka District ba kin wanrah sa katno tylli ki post kiba dang sah (vacant) ha ki tnad jong ki ryngkat ka jingpynbiang ïa ka roster, namar un kwah ban pynsah teng ïa ki post kiba dei ban khot Advertisement na ka bynta ki nong apply kam.
Ula ong na ka daw ka jingslem ban khot Written Exam ïa kiba bun ki post naduh u snem 2020 kawei na ka daw ka long jingwan ka khlam Covid-19 nalor ka jingduna ki Hall thoh exam bad ka jingwan jong ka Roster System. Kum u MLA ula ai jingmut ban don noh da ka por ban pyndep haba don kano kano ka jingkhot Advertisement ïa ki post khnang ba kan ym ktah ïa ka rta ki nong apply.