Ka sorkar jylla mynta ka sngi ka la pynkhreh ban mang 15 klur na ka bynta ban pynitynnad shuh shuh ia ka ïewduh ka ba dei kawei na ki iew kaba hehduh ha ka jylla.
Ia kane la pynbna da u Myntri Rangbah ka sorkar jylla u Conrad K Sangma ha ka jingleit leit jurip ia ka iewduh ha ryngkat ka jingsynran lang u Symbud Myntri Rangbah u Bah Prestone Tynsong, u Myntri Sorkar jylla u bah Paul lyngdoh, ki bor pyniaid ka Hima Mylliem, bad ki ophisar sorkar na ka tnad bapher bapher jong ka jylla.
Ha kane ka jingjurip u Myntri Rangbah u la pynbna ruh 15 klur na ka bynta ban pynitynnad ia ka Ïewduh kynthup ruh ban maramot ia ki pipe um ban siang ia ki footpath ki lynti synkieng bad kumjuh ban pynheh ia ka Ïewduh.
U Myntri Rangbah u la ioh ruh ban iakren bad kato katne ki nongshong ïew ha kaba ki la ioh ban pynsngew ia ki jingeh ha u myntri rangbah ha kaba u la kular ban shimkhia namar ka ïewduh ka dei kawei na ki ïew kaba heh bha ha ka ri khasi ha kaba ki paidbah na kylleng ka ri Khasi ki iashim bynta ha kane ka ïew.
