U EM ka tnad Trade ka KHADC u Bah Winston Tony Lyngdoh mynta ka sngi ka 20 tarik u la pynshai haba iadei bad ka jingshah khang khyrdep ka jaka khrong khajna jong ka KHADC ha ka shnong Umdihar ha ki bor pyniaid District Administration ka Nongpoh.
Haba kren sha ki lad pathai khubor u la pynpaw kane ka Gate ba khrong khajna ka dei jong ka tnad Trade ka KHADC bad na ka liang ka ophis ruh ka khlem leh kino kino ki kam beaiñ namar la aiti ia kane ka kam ruh lyngba ka Work Order. U la pyntip ba kiba pyniaid ia kane ka Gate jong ka Council ruh ki la bud thik katkum ki kyndon jong ka KHADC ha ryngkat ka jingbthah na ki ophisar ka District Council.
Shuh shuh u la ong ba na ka liang ka District Council kin ap ia ka jingthoh ba ki ioh na ki bor pyniaid District na Nongpoh bad kin sa jubab da ka lynti kaba dei.