U myntri rangbah ka sorkar jylla u Conrad K. Sangma haka jingkren sha ki lad phathi khubor mynta ka sngi 21 tarik u Jymmang ula pynsngew shibun ki kam pynroi kiba yn sa trei pynnoh ha Jowai hadien ba u MLA ka thaiñ u ma Wailadmiki Shylla ula wan ban pynsngew.
Na kine ki kam pynroi kynthup ïa ka Mini Secretariat ha Jowai kaba don haduh lai tylli ki Block, kaba la tei mynta ka dei ka ‘West Block’ kaba la dep 85% bad kaba sah ka long sa ka ‘East Block’ bad ka ‘North Block’ ïa kane u Myntri Rangbah ula kular ban buddien ïa ka kam.
Ha kaba ïadei bad ka jingkyntu u MLA ka thain ban pynheh ïaka building jong ka Kiang Nangbah Govt. College, ula pyntip ïa kane ka kam kala ïaid shakhmat ïa kaba ka sorkar kala dep ban mang pisa bad kan ïarap kumjuh ïa ki samla pule ka Ri-Lum Jaiñtia baroh kawei.
Ha kaba ïadei bad ka Nursing College ha Jowai ïa kaba dep ban kular bad ïa kane ka kam ruh kala ïaid shakhmat ban sdang noh. Kumjuh ruh ïaka jingdonkam ban don ïa ka (ALS) Ambulance hapoh ka West Jaiñtia District bad ïa kane ruh ula kular ban leh ïa kaba donkam.