U Myntri Rangbah duh ka jylla u Conrad K. Sangma mynta ka sngi hadien ka jingïakynduh bad ki dkhot ka Jaiñtia Students’ Union (JSU) ha CTC Orchid Inn Tnadlaskeiñ, ula kubur ba ka result exam jong ka SSLC mynta u snem kala kiew bha ha ka jingpass jong ki samla pule haduh ba ym lah shuh ban mutdur bad kane kala buh jingeh ïa ki samla kiba dang duh klas haduh mynta.
Halor kane ka jingduh klas jong ki samla pule hapoh ka Ri-Lum Jaiñtia ula ong katkum ka jingdon ki seat ha ki College kila bun pynbna da ki number jong ki khynnah pule Klas XI kiba apply, u kyrmen skhem ha u snem ban wan yn sa lah ban pynbeit ïa kane ka jingeh.
Shuh shuh ula ong kaba eh mynta katkum ka jingdawa ka long kiba bun hi ki khynnah pule ki kwah ban leit rung sha ki jaka pule jong ka sorkar kum ha Tura College bad kumjuh ha Kiang Nangbah Govt. College bad kane kala buh jingeh ïa kitei ki jaka pule ban pdiang ïa baroh.
Ha ka juh ka por u Myntri Rangbah ula pdiang ïa ka jingai jingmut jong u MLA ka Jowai bad ki dkhot jong ka JSU ban pynlong noh da ki Extra Class kum ka Morning bad Evening section bad ban pynheh ïa ka building jong ka Kiang Nangbah bad ka Govt. Boys HSS.
Ha kaba ïadei bad ka jingdawa ban pynbun ïa ki jaka pule (College) hapoh ka jylla, u myntri ula ong ka sorkar kala pynleit jingmut bha mynta ban ïarap pisa ban pynbha ïa ki jaka pule hapoh ka ‘People College’. Katba ha kaba ïadei bad ka jingdawa Govt. College ha East Jaiñtia Hills na ka liang jong u, ula pyntip ba ka sorkar kan sa shong bishar bniah ïa kane.