Ka Jaintia Students Union (JSU) Seng Kmie kala pynshai ha ka jingiadei bad ka khubor kaba la pynmih da ka Dorbar Shnong Khimusniang mynta ka sngi.
Ka JSU kala pynpaw ba hadien ba ka la ioh shibun ki jingud jingnam na ki nongleit nongwan na ka jingsniew palat pud jong u surok Urkhla ban poi sha Treatment Plant jong ka PHE, kumta ka Seng kala leit ban buh jingthoh sha ka tnad PHE lyngba ka JSU Jowai Circle bad kala ioh lad ruh ban ia kynduh ia u Myntri jong ka PHE bad buh ia ka dorkhas na ka bynta ban maramot noh ia utei u surok.
Na ka liang jong u Myntri ka PHE u Marcuis N Marak ula kular ia ka Seng ba yn sa shna noh ia une u surok. Ka tnad PHE kaba don ka ophis treikam ha Khimusniang ka trei na ka bynta ka ri Lum Jaintia baroh kawei kumta ka seng ka sngew ba ka don hok ban dawa ia kino kino ki kam ki ban pynmyntoi ia ki nongshong shnong baroh, la ong ka JSU.
Da kaba burom ia ka Dorbar Shnong Khimusniang, ka JSU Seng Kmie ka la pynshai bad pyntip sha baroh ki shnong kiba hap hapoh ka Ri Lum Jaintia bad sha ki Dorbar Shnong baroh ba ka Seng ka lah ban trei kino kino ki kam kiba iadei bad ka bha ka miat jong ki nongshong shnong bad ym don ba lah ban khang, wat ka sorkar ruh kam lah ban khang haba trei ia ki mat ba iadei bad ka imlang ka sahlang.
Ha kajuh ka por ka JSU ka pynpaw ba ka jingdawa ban pynbha ia u surok Urkhla ym dei ba ka pan jingtrei ialade, hynrei ka shu kyntu ia ka Sorkar ban shna pynbha ia utei u surok, ka sngewphylla ban iohi ia kum kine ki khubor, ba haba don ki jingmyntoi dang don kiba pynpaw ia ka jingsngewsih. Ka Seng ka pynkut da kaba ong ba ym dei ban pynlong ishu politik ia utei u surok.
Kane ka long katkum ka kyrwoh ba la phah da u President Rangbah ka Seng JSU u samla Jersom Shylla.