Ki bor pynïaid District ka West Jaiñtia Hills lyngba u Deputy Commissioner & Chairman District Disaster Management Authority ula pyntip sha baroh ki nongshong shnong hapoh ka Laskeiñ C&RD Block, khamtam ki shnong kiba don sha ki bynta ba sha rung ka Wah Kupli ban kin long kiba husiar bha namar ba hap pyllait noh ïa ka um na ka dam Khandong jong ka Kopili Hydro Power Station, Umrango, Assam.
Katkum ka shithi bala phah da ka North Eastern Electrical Power Corporation Limited (NEEPCO) la pyntip na ka daw ka jingkiew palat jong ka um ha ka Wah Kupli na ka jingbteng u slap kaba la kynjoh sha ka level (719.33 m) kumta la hap ban plie noh ïa baroh ki 7 tylli ki gate jong ka dam.
Baroh ki nongshong shnong kiba don sha ki bynta ba sha rung jong ka dam ki dei ban long kiba husiar ban leit sha ki bynta ba shajan jong ka wah bad kymjuh ïa ki jingri jong ki, khnang ban lait na kino kino ki jingjia ba sngewsih.
Kumta la bthah ruh ïa u Block Development Officer jong ka Laskeiñ C&RD Block ba un ai jingtip mar mar sha ka ophis u Deputy Commissioner lada don kino kino ki jingjia ba kyrkieh.